Devīkālottarāgama

sarveṣāmapi muktyarthaṃ muktimārgasya darśanam deveśa jñānamācāraṃ kṛpayā kathayasva me īśvara uvāca jñānācārau varārohe kathayāmi tavādhunā praviśanti yato mokṣaṃ jñānino dhvastakalmaṣam yeṣāṃ bodhena saṃjātaṃ kālajñānaṃ varānane na teṣāṃ jāyate bodhaḥ śāstrakoṭiśatairapi ato…

1. Canonagamatextual
2. AttributionThe Digital Corpus of Sanskrit (DCS), Oliver Hellwigtextual
3. SourceUpstream TEI document · san · Latnpublished primary

sarveṣāmapi muktyarthaṃ muktimārgasya darśanam deveśa jñānamācāraṃ kṛpayā kathayasva me īśvara uvāca jñānācārau varārohe kathayāmi tavādhunā praviśanti yato mokṣaṃ jñānino dhvastakalmaṣam yeṣāṃ bodhena saṃjātaṃ kālajñānaṃ varānane na teṣāṃ jāyate bodhaḥ śāstrakoṭiśatairapi ato hi nirbhayo vidvān niḥśaṅko vigataspṛhaḥ jñānotsāhaparo bhūyāt śraddadhāno nirākulaḥ nirmamaḥ karuṇopetaḥ sarvabhūtābhayapradaḥ bhajet kālottaraṃ devi mumukṣuryogatatparaḥ sa brahmā sa śivo viṣṇuḥ sa indraḥ sa ṣaḍānanaḥ sa guruḥ sarvadevāśca sa yogī sa tapodhanaḥ paṇḍitaḥ sa mahābhāgaḥ kṛtārthaḥ paramārthataḥ caladvāyusamaṃ cittaṃ dhriyate yena niścalam sa upāyo mimokṣasya sadupāttaguṇastu saḥ sā prajñā tadiha sthairyaṃ tatpuṇyaṃ vyavasāyinām tadeva tīrthaṃ dānaṃ ca sa tapaśca na saṃśayaḥ yenopāyena badhyeta vāyubhiścalanaṃ manaḥ citte calati saṃsāro niścalo mokṣa eva tu tasmāccittaṃ sthiraṃ kuryāt prajñayā parayā budhaḥ ekāntikaṃ sukhaṃ yatra tathāivātyantikaṃ bhavet niṣkarmaṇi pare tattve ko na rajyeta paṇḍitaḥ nivṛtto viṣayajñānāt niṣkalajñānatatparaḥ anicchannapi medhāvī labhate mokṣamakṣayam asmitākalayā yuktaṃ caitanyaṃ sakalaṃ smṛtam asmitārahitaṃ cetaś caitanyaṃ śaktirucyate tathā prakāśitaṃ viśvaṃ śaktidhyānamudāhṛtam sarvālambavinirmuktaṃ niṣkalaṃ jñānamucyate ahamaṃśena yacchūnyaṃ cinmātrālokamadvayam muktibījaṃ tadākhyātaṃ parayogapravartakam cakrāṇi nāḍayaḥ padmadevatābījamaṇḍalam rūpamityādikaṃ kiṃcid dhyeyaṃ naiva kadācana kuhakaṃ mantrajālaṃ ca prāṇāyāmādi dhāraṇam sarvametanna kartavyaṃ mokṣamakṣayamicchatā nātra pūjā namaskāro na japo dhyānameva ca kevalaṃ jñānamityuktaṃ veditavyaṃ na kiṃcana bahirāhitacittānāṃ jāyante bandhahetavaḥ bahiścittaṃ nivāryaiva vindan loke na sīdati nātra kiṃcidbahirnāntaṃ na madhyaṃ nāpyadhaḥ kvacit sarvākāraṃ nirākāraṃ svasaṃvedyaṃ virājate yadyadālokya yo jantuḥ kurute karmasañcayam tadgatirjāyate yasmān nirālokaṃ tu cintayet heturnāsti phalaṃ nāsti nāsti karma svabhāvataḥ asadbhūtamidaṃ sarvaṃ nāsti loko na laukikaḥ nirālambamidaṃ sarvaṃ nirālambaprakāśitam nirālambamidaṃ kṛtvā nirālambo bhaviṣyati vyomākāraṃ mahāśūnyaṃ vyāpakaṃ yo na bhāvayet saṃsārī sa bhavelloke bījakośakrimiryathā jñānotpattinimittaṃ tu kriyāścaryāḥ prakīrtitāḥ yogaṃ sālambanaṃ tyaktvā niṣprapañcaṃ vicintayet pātālāt śaktiparyantaṃ sarvametadabhīpsitam bhagnaṃ yaiḥ śūnyamantreṇa te smṛtāḥ śūnyavedinaḥ viṣaye lolupaṃ cittaṃ markaṭādapi cañcalam sarvaśūnyapade sthitvā tato nirvāṇameṣyati sarvatattvādyasaṃbhinnaṃ dehād bhinnaṃ tathaiva ca ahamasmādyasambhinnaṃ caitanyaṃ sarvatomukham ākāśamiva sarvaṃ tu sabāhyābhyantaraṃ priye parānandamarūpaṃ tu paśyannānandabhāgbhavet nirindhano yathā vahniḥ svayameva praśāmyati grāhyābhāvānmanastadvat svayameva pralīyate mohikā mūrchikā māyā svapnaśceti caturvidhaḥ suṣuptirjāgṛtiścaiva sarvametat parityajet dehāt sūkṣmagatāt prāṇāccittād buddherahaṅkṛteḥ sarvasmādbhinna evāhaṃ cintayan labhate citam sadābhibhūtaye cittaṃ nidrayā smaraṇādinā bodhayitvā prayatnena kuryāt svasthaṃ punaḥ punaḥ yadā sthiraṃ bhaveccittaṃ cālayanna kathaṃcana na kiṃciccintayet tatra sthirameva tu kārayet āśrayālambanaṃ cittaṃ tadvat kuryānnirāśrayam cañcalaṃ niścalaṃ kuryāt niścalaṃ na tu cālayet sarvabhūtalaye jāte yadyadvyoma sunirmalam tattadrūpaṃ svakaṃ dhyāyed vyāptaṃ caiva tu nirmalam tadeva janmasāphalyaṃ pāṇḍityamidameva hi caladvāyusamaṃ cittaṃ niścalaṃ dhriyate hi yat naivordhvaṃ dhārayeccittaṃ na madhyaṃ nāpyadhaḥ kvacit antarbhāvavinirmuktaṃ sadā kuryānnirāśrayam nidrāyāṃ bodhayeccittaṃ vikṣiptaṃ śamayet punaḥ pakṣadvayaparityāge samprāpte naiva cālayet nirāśrayaṃ sadā cittaṃ sarvālambanavarjitam mano'vasthāvinirmuktaṃ vijñeyaṃ muktilakṣaṇam sarvālambanaśūnyaṃ ca dhārayitvā mano hṛdi yajjñānaṃ jāyate spaṣṭaṃ tadabhyāsaparo bhavet ye dhyāyanti paraṃ śūnyaṃ niṣkalaṃ niravasthitam te yānti paramaṃ sthānaṃ janmamṛtyuvivarjitam devā devyastathā cānye dharmādharmau ca tatphalam āśrayāśrayivijñānaṃ saṃsārasya ca bandhanam āśrayo dvandvamityuktaṃ dvandvatyāgāt parodayaḥ jīvanmuktastadā yogī dehatyāgād vimucyate vairāgyeṇa vapustyāgo na vai kāryo manīṣiṇā ārambhataḥ kriyānāśe svayameva vipatsyate hṛtsaroje hyahaṃrūpā yā citirnirmalācalā ahaṅkāraparityāgāt sā citirmokṣadāyinī sarvopādhivinirmuktaṃ cidrūpaṃ yannirantaram tacchivo 'hamiti dhyātvā sarvāsaktiṃ visarjayet deśajātyādisambaddhān varṇāśramasamanvitān bhāvānetān parityajya svabhāvaṃ bhāvayedbudhaḥ ahameko na me kaścin nāhamanyasya kasyacit na taṃ paśyāmi yasyāhaṃ taṃ na paśyāmi yo mama ahameva paraṃ brahma jagannātho maheśvaraḥ iti syānniścito mukto baddhaḥ syādanyathā pumān aśarīraṃ yadātmānaṃ paśyati jñānacakṣuṣā tadā bhavati śāntātmā sarvato vigataspṛhaḥ yo 'sau sarveṣu śāstreṣu paṭhyate hyaja īśvaraḥ akāyo nirguṇo hyātmā so 'hamasmi na saṃśayaḥ vijñāptimātro hi sadā viśuddhaḥ sarvatra yasmātsatataṃ vimuktaḥ nādeyaheyo hy aham apratarkyas tasmātsadā brahmamayo viśokaḥ ā mastakaṃ pādatalāvasānaṃ sāntarbahiścarmapaṭāvanaddham tatkṛtsnamevāmṛtarūpamanyac cidrūpamātmānamananyasiddhim īśo 'hamevāsya carācarasya pitā ca mātā ca pitāmahaśca dhyānaṃ samāsthāya padaṃ caturthaṃ dhyāyanti māmeva vimuktikāmāḥ brahmādibhirdevamanuṣyanāgair gandharvayakṣāpsarasāṃ gaṇaiśca yajñairanekairahameva pūjyo māmeva sarve pratipūjayanti tapobhirugrairvividhaiśca dānair māmeva sarve pratipūjayanti bhūtāni cāhaṃ sthirajaṅgamāni yāvanti cānyānyahameva tāni na sthūlasūkṣmo na ca śūnyarūpo jñānaikarūpo jagadekabandhuḥ nirantaro nirmala īśvaro 'haṃ svapnādyavasthācyutiniṣprapañcaḥ anādivijñānamajaṃ purāṇaṃ guhāśayaṃ niṣkalamaprapañcam nirañjanaṃ niṣpratimaṃ nirīśam adṛśyam agrāhyam acintyarūpam sanātanaṃ brahma nirantaraṃ yat pade pade so 'hamiti prapaśyet yo bhāvatastiṣṭhati niṣprakampaḥ sa brahmabhūto 'mṛtatāmupaiti jñānamevaṃ varārohe kathitaṃ mokṣasiddhaye ācāraṃ kathyamānaṃ tu sāmprataṃ śṛṇu taṃ mayā na snānaṃ na japaḥ pūjā homo naiva ca sādhanam agnikāryādikāryaṃ ca naitasyāsti maheśvari niyamo 'pi na tasyāsti kṣetrapīṭhe ca sevanam nārcanaṃ pitṛkāryādi tīrthayātrā vratāni ca dharmādharmaphalaṃ nāsti na tithirlaukikakriyā saṃtyajetsarvakarmāṇi lokācāraṃ ca sarvaśaḥ samayācāraniḥśeṣān kṛtyajātaṃ tu bandhanam saṃkalpaṃ ca vikalpaṃ ca ye cānye kuladharmikāḥ siddhīśca vividhākārāḥ pātālādi rasāyanam pratyakṣeṇāpi labhyeran naiva gṛhṇīta sādhakaḥ sarve te paśubandhāḥ syur adhomārgapradāyakāḥ etairnāsti parā muktiś cidrūpaṃ vyāpakaṃ vinā yena kena viśeṣeṇa sarvāvastho 'pi yogadhṛk kṣetrapīṭhe ca sandehād varjayedyadi kautukam kṛmikīṭapataṅgāśca tathā devi vanaspatīn na nāśayed budho jīvān paramārthamatiryataḥ na mūlotpāṭanaṃ kuryāt pattracchedaṃ vivarjayet bhūtapīḍāṃ na kurvīta puṣpāṇāṃ ca nikṛntanam svayampatitapuṣpaistu kartavyaṃ śivapūjanam māraṇoccāṭanādīni vidveṣastambhane tathā jvarabhūtagrahāveśavaśyākarṣaṇamohanam na kuryāt kṣudrakarmāṇi kāṣṭhapāṣāṇapūjanam samo 'mitre ca mitre ca samo loṣṭe ca kāñcane abhilāṣo na kartavya indriyārthe kadācana ātmārāmo bhavedyogī nirbhayo vigataspṛhaḥ samanindāpraśaṃsaśca sarvabhūtasamastathā samadṛṣṭistu kartavyā yathātmani tathā pare vivādaṃ lokagoṣṭhīṃ ca kalahāśca vivarjayet śāstragoṣṭhīṃ na kurvīta kubhāṣitasubhāṣitān īrṣyāṃ paiśunyadambhe ca rāgaṃ mātsaryameva ca kāmakrodhau bhayaṃ śokaṃ tyajetsarvaṃ śanaiḥ śanaiḥ sarvadvandvavinirmuktaḥ santataṃ janavarjitaḥ anenaiva śarīreṇa sarvajñaḥ san prakāśate jñānenaiva yathā mokṣas tathā siddhirnirarthikā tathāpi bhogamicchantaḥ siddhimicchanti sādhakāḥ aṇimādiguṇāvāptir jāyatāṃ vā na jāyatām tathāpi mucyate dehī patiṃ vijñāya nirmalam pañcabhūtātmako dehaḥ śivastatraiva tiṣṭhati śivādyavaniparyanto loko 'yaṃ śaṅkarātmakaḥ īdṛśaṃ jñāninaṃ dṛṣṭvā pūjayanti ca ye narāḥ gandhaṃ puṣpaṃ phalaṃ dhūpaṃ snānaṃ vastraṃ ca bhojanam nivedayanti ye kecid vāṅmanaḥkāyakarmabhiḥ tathaiva te vimucyante muktimārgābhikāṅkṣiṇaḥ stutinindākarāstasya puṇyapāpe samāpnuyuḥ yajjñānācaraṇaṃ pṛṣṭaṃ tat sarvaṃ kathitaṃ mayā kālajñānaṃ varārohe kimanyat paripṛcchasi