Acintyastava

pratītyajānāṃ bhāvānāṃ naiḥsvābhāvyaṃ jagāda yaḥ taṃ namāmy asamajñānam acintyam anidarśanam yathā tvayā mahāyāne dharmanairātmyam ātmanā viditaṃ deśitaṃ tadvad dhīmadbhyaḥ karuṇāvaśāt pratyayebhyaḥ samutpannam anutpannaṃ tvayoditam svabhāvena na taj jātam iti śūnyaṃ prakāśita…

1. Canonstotratextual
2. AttributionThe Digital Corpus of Sanskrit (DCS), Oliver Hellwigtextual
3. SourceUpstream TEI document · san · Latnpublished primary

pratītyajānāṃ bhāvānāṃ naiḥsvābhāvyaṃ jagāda yaḥ taṃ namāmy asamajñānam acintyam anidarśanam yathā tvayā mahāyāne dharmanairātmyam ātmanā viditaṃ deśitaṃ tadvad dhīmadbhyaḥ karuṇāvaśāt pratyayebhyaḥ samutpannam anutpannaṃ tvayoditam svabhāvena na taj jātam iti śūnyaṃ prakāśitam yadvacchabdaṃ pratītyeha pratiśabdasamudbhavaḥ māyāmarīcivac cāpi tathā bhavasamudbhavaḥ māyāmarīcigandharvanagarapratibimbakāḥ yady ajātāḥ saha svapnair na syāt taddarśanādikam hetupratyayasambhūtā yathaite kṛtakāḥ smṛtāḥ tadvat pratyayajaṃ viśvaṃ tvayoktaṃ nātha sāṃvṛtam asty etat kṛtakaṃ sarvaṃ yat kiṃcid bālalāpanam riktamuṣṭipratīkāśam ayathārthaprakāśitam kṛtakaṃ vastu no jātaṃ tadā kiṃ vārtamānikam kasya nāśād atītaṃ syād utpitsuḥ kim apekṣate svasmān na jāyate bhāvaḥ parasmān nobhayād api na san nāsan na sadasan kutaḥ kasyodayas tadā ajāte na svabhāvo 'sti kutaḥ svasmāt samudbhavaḥ svabhāvābhāvasiddhyaiva parasmād apy asaṃbhavaḥ svatve sati paratvaṃ syāt paratve svatvam iṣyate āpekṣikī tayoḥ siddhiḥ pārāvāram ivoditā yadā nāpekṣate kiṃcit kutaḥ kiṃcit tadā bhavet yadā nāpekṣate dīrghaṃ kuto hrasvādikaṃ tadā astitve sati nāstitvaṃ dīrghe hrasvaṃ tathā sati nāstitve sati cāstitvaṃ yat tasmād ubhayaṃ na sat ekatvaṃ ca tathānekam atītānāgatādi ca saṃkleśo vyavadānaṃ ca samyaṅmithyā svataḥ kutaḥ svata eva hi yo nāsti bhāvaḥ sarvo 'sti kas tadā para ity ucyate yo 'yaṃ na vinā svasvabhāvataḥ na svabhāvo 'sti bhāvānāṃ parabhāvo 'sti no yadā bhāvagrahagrahāveśaḥ paratantro 'sti kas tadā ādāv eva samaṃ jātāḥ svabhāvena ca nirvṛtāḥ anutpannāś ca tattvena tasmād dharmās tvayoditāḥ niḥsvabhāvās tvayā dhīman rūpādyāḥ saṃprakāśitāḥ phenabudbudamāyābhramarīcikadalīsamāḥ indriyair upalabdhaṃ yat tat tattvena bhaved yadi jātās tattvavido bālās tattvajñānena kiṃ tadā jaḍatvam apramāṇatvam athāvyākṛtatām api viparītaparijñānam indriyānāṃ tvam ūcivān ajñānenāvṛto yena yathāvan na prapadyate lokas tena yathābhūtam iti matvā tvayoditam astīti śāśvatī dṛṣṭir nāstīty ucchedadarśanam tenāntadvayanirmukto dharmo 'yaṃ deśitas tvayā catuṣkoṭivinirmuktās tena dharmās tvayoditāḥ vijñānasyāpy avijñeyā vācāṃ kimuta gocarāḥ svapnendrajālikodbhūtaṃ dvicandrodvīkṣaṇaṃ yathā bhūtaṃ tadvastu no bhūtaṃ tathā dṛṣṭaṃ jagat tvayā utpannaś ca sthito naṣṭaḥ svapne yadvat sutas tathā na cotpannaḥ sthito naṣṭa ukto loko 'rthatas tvayā kāraṇāt saṃbhavo dṛṣṭo yathā svapne tathetaraḥ saṃbhavaḥ sarvabhāvānāṃ vibhavo 'pi matas tathā rāgādijaṃ yathā duḥkhaṃ saṃkleśasaṃsṛtī tathā saṃbhārapūraṇān muktiḥ svapnavad bhāṣitā tvayā jātaṃ tathaiva no jātam āgataṃ gatam ity api baddho muktas tathā jñānī dvayam icchen na tattvavit utpattir yasya naivāsti tasya kā nirvṛtir bhavet māyāgajaprakāśatvād ādiśāntatvam arthataḥ utpanno 'pi na cotpanno yadvan māyāgajo mataḥ utpannaṃ ca tathā viśvam anutpannaṃ ca tattvataḥ ameyair aprameyānāṃ pratyekaṃ nirvṛtiḥ kṛtā lokanāthair hi sattvānāṃ na kaścin mocitaś ca taiḥ te ca sattvāś ca no jātā ye nirvānti na te sphuṭam na kaścin mocitaḥ kaiścid iti proktaṃ mahāmune māyākārakṛtaṃ yadvad vastu śūnyaṃ tathetarat vastuśūnyaṃ jagat sarvaṃ tvayoktaṃ kārakas tathā kārako 'pi kṛto 'nyena kṛtatvaṃ nātivartate athavā tatkriyākartṛkārakasya prasajyate nāmamātraṃ jagat sarvam ity uccair bhāṣitaṃ tvayā abhidhānāt pṛthagbhūtam abhidheyaṃ na vidyate kalpanāmātram ity asmāt sarvadharmāḥ prakāśitāḥ kalpanāpy asatī proktā yayā śūnyaṃ vikalpyate bhāvābhāvadvayātītam anatītaṃ ca kutracit na ca jñānaṃ na ca jñeyaṃ na cāsti na ca nāsti yat yan na caikaṃ na cānekaṃ nobhayaṃ na ca nobhayam anālayam athāvyaktam acintyam anidarśanam yan nodeti na ca vyeti nocchedi na ca śāśvatam tad ākāśapratīkāśaṃ nākṣarajñānagocaram yaḥ pratītyasamutpādaḥ śūnyatā saiva te matā tathāvidhaś ca saddharmas tatsamaś ca tathāgataḥ tat tattvaṃ paramārtho 'pi tathatā dravyam iṣyate bhūtaṃ tad avisaṃvādi tadbodhād buddha ucyate buddhānāṃ sattvadhātoś ca tenābhinnatvam arthataḥ ātmanaś ca pareṣāṃ ca samatā tena te matā bhāvebhyaḥ śūnyatā nānyā na ca bhāvo 'sti tāṃ vinā tasmāt pratītyajā bhāvās tvayā śūnyāḥ prakāśitāḥ hetupratyayasambhūtā paratantrā ca saṃvṛtiḥ paratantra iti proktaḥ paramārthas tv akṛtrimaḥ svabhāvaḥ prakṛtis tattvaṃ dravyaṃ vastu sad ity api nāsti vai kapito bhāvo paratantras tu vidyate astīti kalpite bhāve samāropas tvayoditaḥ nāstīti kṛtakocchedād ucchedaś ca prakāśitaḥ tattvajñānena nocchedo na ca śāśvatatā matā vastuśūnyaṃ jagat sarvaṃ marīcipratimaṃ matam mṛgatṛṣṇājalaṃ yadvan nocchedi na ca śāśvatam tadvat sarvaṃ jagat proktaṃ nocchedi na ca śāśvatam dravyam utpadyate yasya tasyocchedādikaṃ bhavet antavān nāntavāṃś cāpi lokas tasya prasajyate jñāne sati yathā jñeyaṃ jñeye jñānaṃ tathā sati yatrobhayam anutpannam iti buddhaṃ tadāsti kim iti māyādidṛṣṭāntaiḥ sphuṭam uktvā bhiṣagvaraḥ deśayāmāsa saddharmaṃ sarvadṛṣṭicikitsakam etat tat paramaṃ tattvaṃ niḥsvabhāvārthadeśanā bhāvagrahagṛhītānāṃ cikitseyam anuttarā dharmayājñika tenaiva dharmayajño niruttaraḥ abhīkṣṇam iṣṭas trailokye niṣkapāṭo nirargalaḥ vastugrāhabhayocchedī kutīrthyamṛgabhīkaraḥ nairātmyasiṃhanādo 'yam adbhuto naditas tvayā śūnyatādharmagambhīrā dharmabherī parāhatā naiḥsvābhāvyamahānādo dharmaśaṅkhaḥ prapūritaḥ dharmayautukam ākhyātaṃ buddhānāṃ śāsanāmṛtam nītārtham iti nirdiṣṭaṃ dharmāṇāṃ śūnyataiva hi yā tūtpādanirodhādisattvajīvādideśanā neyārthā ca tvayā nātha bhāṣitā saṃvṛtiś ca sā prajñāpāramitāmbhodher yo 'tyantam pāram āgataḥ sa puṇyaguṇaratnāḍhyas tvadguṇārṇavapāragaḥ iti stutvā jagannātham acintyam anidarśanam yad avāptaṃ mayā puṇyaṃ tenāstu tvatsamaṃ jagat ity acintyastavaḥ samāptaḥ