Kālikāpurāṇa

aurvva uvāca evaṃ vadati bhūteśe tadā vetālabhairavau prāhatur vyomakeśaṃ tau harṣotphullavilocanau vetālabhairavāvūcatuḥ pārvatyā na hi jānīvo dhyānaṃ mantraṃ vidhiṃ tathā kathamārādhayiṣyāvo bhagavan samyagucyatām śrībhagavānuvāca mahāmāyāvidhiṃ mantraṃ kalpaṃ ca bhavatoḥ su…

1. Canonpuranatextual
2. AttributionThe Digital Corpus of Sanskrit (DCS), Oliver Hellwigtextual
3. SourceUpstream TEI document · san · Latnpublished primary

aurvva uvāca evaṃ vadati bhūteśe tadā vetālabhairavau prāhatur vyomakeśaṃ tau harṣotphullavilocanau vetālabhairavāvūcatuḥ pārvatyā na hi jānīvo dhyānaṃ mantraṃ vidhiṃ tathā kathamārādhayiṣyāvo bhagavan samyagucyatām śrībhagavānuvāca mahāmāyāvidhiṃ mantraṃ kalpaṃ ca bhavatoḥ sutau upadekṣyāmi tattvena yena sarvaṃ bhaviṣyati aurvva uvāca ityuktvā sa mahāmāyādhyānaṃ mantraṃ vidhiṃ tathā kathayāmāsa giriśastayoḥ samyaṅ nṛpottama yadaṣṭādaśabhiḥ paścātpaṭalaiśca sa bhairavaḥ sa nirṇayavidhiṃ kalpaṃ nibabandha śivāmṛte sagara uvāca kīdṛṅ mantraṃ purā śambhuravocadubhayostayoḥ yenārādhya mahāmāyāṃ tau gaṇeśatvamāpatuḥ sakalpaṃ sarahasyaṃ ca sāṅgaṃ tacchrotumutsahe daśāṣṭapaṭalairyat tu nibabandha sa bhairavaḥ aurvva uvāca bahutvād vadituṃ tasya cireṇaiva tu śakyate tasmāt sadyaḥ samuddhṛtya yanmahādevabhāṣitam saṃkṣepāt kathaye tattvaṃ tacchṛṇuṣva nṛpottama pṛcchantau pārvatīmantraṃ tadā vetālabhairavau jagāda sa mahādevaḥ śṛṇutaṃ mantrakalpakau śrībhagavānuvāca śṛṇu mantraṃ pravakṣyāmi guhyād guhyatamaṃ param aṣṭākṣaraṃ tu vaiṣṇavyā mahāmāyāmahotsavam asya śrīvaiṣṇavīmantrasya nāradaṛṣiḥ śambhurdevatā anuṣṭup chandaḥ sarvārthasādhane viniyogaḥ hāntāntapūrvo rāntaśca nānto ṇāntastathaiva ca kaikādaśāṣṭādiṣaṣṭhaḥ khānto viṣṇupuraḥsaraḥ ebhiraṣṭākṣarairmantraṃ śoṇapatrasamaprabham oṃkāraṃ pūrvataḥ kṛtvā japyaṃ sarvaistu sādhakaiḥ mahāmantramidaṃ guhyaṃ vaiṣṇavīmantrasaṃjñakam mantraṃ kalevaragataṃ tasmādaṅgaṃ prakīrtitam mahādevasyordhvamukhaṃ bījametat prakīrtitam oṃkārākṣarabījaṃ ca yakāraḥ śaktirucyate sabījaṃ kathitaṃ mantraṃ kalpaṃ ca śṛṇu bhairava tīrthe nadyāṃ devakhāte gartaprasravaṇādike parakīyetare toye snānaṃ pūrvaṃ samācaret ācāntaḥ śucitāṃ prāptaḥ kṛtāsanaparigrahaḥ uttarābhimukho bhūtvā sthaṇḍilaṃ mārjayet tataḥ kareṇānena mantreṇa yūṃ saḥ kṣityā iti svayam oṃ hrīṃ sa iti mantreṇa āśāpūraṇakena ca toyairabhyukṣayet sthānaṃ bhūtānāmapasāraṇe tataḥ savyena hastena gṛhītvā sthaṇḍilaṃ śuciḥ mantraṃ likhet suvarṇena yājñikena kuśena vā oṃ vaiṣṇavyai nama iti mantrarājamathāpi vā tatastrimaṇḍalaṃ kuryāt tenaiva samarekhayā nityāsu na hi pūjāsu rajobhirmaṇḍalaṃ likhet puraścaraṇakāryeṣu tatkāmyeṣu prayojayet rekhāmudīcyāṃ prathamaṃ paścime tadanantaram dakṣiṇe tu tataḥ paścāt pūrvabhāge tu śeṣataḥ varṇānāṃ ca saha dvārair evameva kramo bhavet oṃ hīṃ śrīṃ sa iti mantreṇa maṇḍalaṃ pūjayet tataḥ hastena maṇḍalaṃ kṛtvā kuryād digbandhanaṃ tataḥ āśābandhanamantreṇa pūrvoktena yathākramam phaḍantenātmanāpyatra kareṇaiva nibandhayet yavānāṃ maṇḍalairekamaṅgulaṃ cāṣṭabhirbhavet adīrghayojitairhastaiś caturviṃśatiraṅgulaiḥ tatpramāṇena hastena hastaikaṃ tasya maṇḍalam padmaṃ vitastimātraṃ syātkarṇikāraṃ tadardhakam dalānyanyonyasaktāni hyāyatāni niyojayet na nyūnādhikabhāgāni sabahirveṣṭitāni ca madhyabhāge nyased dvāraṃ na nyūne nādhike tathā subaddhaṃ maṇḍalaṃ tacca raktavarṇaṃ vicintayet ito'nyathā maṇḍalamugramasyāḥ karoti yo lakṣaṇabhāgahīnam phalaṃ na cāpnoti na kāmamiṣṭaṃ tasmād idaṃ maṇḍalamatra lekhyam śrībhagavānuvāca tato laṃ iti mantreṇa arghapātrasya maṇḍalam catuṣkoṇaṃ vidhāyāśu dvārapadmavivarjitam oṃ hrīṃ śrīṃ itimantreṇa arghapātraṃ tu maṇḍale vinyaset prathamaṃ tatra pūjayitvā samidhyati oṃ hrīṃ hrauṃ iti mantreṇa gandhapuṣpe tathā jalam arghapātre kṣipet tatra maṇḍalaṃ vinyaset tataḥ pūrvavanmaṇḍalaṃ kṛtvā arghapātre tato jalaiḥ tribhāgaiḥ pūrayetpātraṃ puṣpaṃ tatra viniṣkṣipet tato hrīṃ iti mantreṇa āsanaṃ pūjayetsvakam tataḥ kṣauṃ iti mantreṇa ātmānaṃ pūjayed budhaḥ gandhaiḥ puṣpaiḥ śirodeśe tataḥ pūjāṃ samācaret oṃ hrīṃ sa iti mantreṇa puṣpaṃ hastatalasthitam saṃmṛjya savyahastena ghrātvā vāmakareṇa tu aiśānyāṃ nikṣipedetat pūrvamantreṇa kovidaḥ raktaṃ puṣpaṃ gṛhītvā tu karābhyāṃ pāṇikacchapam baddhvā kuryāttataḥ paścād dahanaplavanādikam vāmahastasya tarjanyāṃ dakṣiṇasya kaniṣṭhikām tathā dakṣiṇatarjanyāṃ vāmāṅguṣṭhaṃ niyojayet unnataṃ dakṣiṇāṅguṣṭhaṃ vāmasya madhyamādikāḥ aṅgulīr yojayet pṛṣṭhe dakṣiṇasya karasya ca vāmasya pitṛtīrthena madhyamānāmike tathā adhomukhe tu te kuryād dakṣiṇasya karasya ca kūrmapṛṣṭhasamaṃ pṛṣṭhaṃ kuryād dakṣiṇahastataḥ evaṃ baddhaḥ sarvasiddhiṃ dadāti pāṇikacchapaḥ kuryāttaddhṛdayāsannaṃ nimīlya nayanadvayam samaṃ kāyaśirogrīvaṃ kṛtvā sthiramanā budhaḥ dhyānaṃ samārabhed devyā dāhaplavanapūrvakam agniṃ vāyau vinikṣipya vāyuṃ toye jalaṃ hṛdi hṛdayaṃ niścale dattvā ākāśe nikṣipetsvanam ūṃ hūṃ phaḍiti mantreṇa bhittvā randhraṃ tu mastake śabdena sahitaṃ jīvamākāśe sthāpayet tataḥ vāyvagniyamaśakrāṇāṃ bījena varuṇasya ca parāsthānaparāś caitaiḥ sārdhacandraiḥ sabindukaiḥ śoṣaṃ dāhaṃ tathocchādaṃ pīyūṣāsevanaṃ param yathākrameṇa kartavyaṃ cintāmātraṃ viśuddhaye tatastu devībījena aṇuṃ jāmbūnadākṛtim tatrāsādya dvidhā kuryāt uṃ hrīṃ śrīṃ iti mantrakāḥ tadūrdhvabhāgeṣu hṛllokaṃ svargaṃ ca khaṃ tathā niṣpādya śeṣabhāgena bhuvaṃ pātālavāriṇi cintayettatra sarvāṇi saptadvīpāṃ ca medinīm tatteṣu sāgarāṃstāṃstu svarṇadvīpaṃ vicintayet tanmadhye ratnaparyaṃkaṃ ratnamaṇḍapasaṃsthitam ākāśagaṅgātoyaughaiḥ sadaiva sevitaṃ śubham tatparyaṃke raktapadmaṃ prasannaṃ sarvadāśivam cintayet svarṇamānāṅkaṃ saptapātālanālakam ā brahmabhuvanasparśi suvarṇācalakarṇikam tatrasthitāṃ mahāmāyāṃ dhyāyedekāgramānasaḥ śoṇapadmapratīkāśāṃ muktamūrdhajalambinīm calatkāñcanāmāruhya kuṇḍalojjvalaśālinīm suvarṇaratnasampannakirīṭadvayadhāriṇīm śuklakṛṣṇāruṇairnetraistribhiścāruvibhūṣitām sandhyācandrasamaprakhyakapolāṃ lolalocanām vipaṅkadāḍimībījadantāṃ subhrūyogojjvalām bandhūkadantavasanāṃ śirīṣaprabhanāsikām kambugrīvāṃ viśālākṣīṃ sūryakoṭisamaprabhām caturbhujāṃ vivasanāṃ pīnonnatapayodharām dakṣiṇordhvena nistriṃśatpareṇa siddhasūtrakam bibhratīṃ vāmahastābhyāmabhītiṃ varadāyinīm nimnanābhikramāyātāṃ kṣaṇimadhyāṃ manoharām ānamannāgapāśorūṃ guptagulphāṃ supārṣṇikām baddhaparyaṅkasaṃkalpāṃ nivīrāsanarājitām gātreṇa ratnasaṃstambhaṃ samyagālambya saṃsthitām kimicchasīti vacanaṃ vyāharantīṃ muhurmuhuḥ pañcānanāṃ puraḥsaṃsthaṃ nirīkṣantīṃ suvāhanām muktāvalīsvarṇaratnahārakaṅkaṇādibhiḥ sarvairalaṅkāragaṇairujjvalāṃ sasmitānanām sūryakoṭipratīkāśāṃ sarvalakṣaṇasaṃyutām navayauvanasampannāṃ tathā sarvāṅgasundarīm īdṛśīmambikāṃ dhyātvā namaḥ phaḍiti mastake svakīye prathamaṃ dadyāt so'hameva vicintya ca aṅganyāsakaranyāsau tataḥ kuryāt krameṇa ca ebhirmantraiḥ svaraiḥ saha sumīsūmaiḥ kramānvitaiḥ oṃ kṣauṃ caite sapraṇavāṃ raktavarṇāṃ manoharām aṅguṣṭhādikaniṣṭhāntamantrasaṃveṣṭanaṃ phaṭ prāntena kuryād vinyāsaṃ pūrvaṃ karataladvaye hṛcchiraḥśikhākavacanetreṣu kramato nyaset tatastu mūlamantrasya vaktre pṛṣṭhe tathodare bāhvorguhye pādayośca jaṅghayorjaghane kramāt vinyasedakṣarāṇyaṣṭau oṃkāraṃ ca tathā smaran ebhiḥ prakārairatiśuddhadehaḥ pūjāṃ sadaivārhati nānyathā hi śarīraśuddhiṃ manaso niveśaṃ bhūtaprasāraṃ kurute nṛṇāṃ tat bhagavānuvāca tato'rghapātre tanmantram aṣṭadhākṛtya saṃjapet tena toyāni puṣpāṇi svaṃ maṇḍalamathāsanam āśodhayettataḥ paścāt pūjopakaraṇaṃ samam oṃ aiṃ hrīṃ hrauṃ iti mantreṇa śabdaprāṃśuvivarjitam dvārapālaṃ tato devyā āsanāni ca pūjayet nandibhṛṅgimahākālagaṇeśā dvārapālakāḥ uttarādikramātpūjyā āsanāni ca madhyataḥ ādhāraśaktiprabhṛti hemādryantān prapūjayet prasiddhān sarvatantreṣu pūjākalpeṣu bhairava daśadikpālasahitān dharmādharmādikāṃstathā maṇḍalāgnyādikoṇeṣu pūjayet pārśvadeśataḥ sūryāgnisomamarutāṃ maṇḍalāni ca padmakam rajastathā tamaḥ sattvaṃ yogapīṭhaṃ guroḥ padam sārādīn bhadrapīṭhāntān sāṅgopāṅgān prapūjayet brahmāṇḍaṃ svarṇaḍimbaṃ ca brahmaviṣṇumaheśvarān sasāgarān saptadvīpān svarṇadvīpaṃ samaṇḍapam ratnapadmaṃ saparyaṅkaṃ ratnastambhaṃ tathaiva ca pañcānanaṃ maṇḍalasya madhye'vaśyaṃ prapūjayet hrīṃ mantreṇa tataḥ kūrmapṛṣṭhaṃ pāṇyornibadhya ca dhyāyecca pūrvavad devīmāsādyāsanam uttamam hṛnmadhye cintayet svarṇadvīpaṃ paryaṅkasaṃbhṛtam paśyanniva tato devīm ekāgramanasā smaret pratyakṣīkṛtya hṛdaye mānasairupacārakaiḥ ṣoḍaśānāṃ prakāraistu hṛdisthāṃ pūjayecchivām tatastu vāyubījena dakṣiṇe ca puṭena ca nāsikāyā viniḥsārya krīṃ mantreṇa ca bhairava sthāpayetpadmamadhye tu taddhastaṃ na viyojayet kṛte viyoge hastasya puṣpāttasmācca bhairava gandharvaiḥ pūjyate devī pūjakairnāpyate phalam āvāhanaṃ tataḥ kuryād gāyatryā śirasā saha mahāmāyāyai vidmahe tvāṃ caṇḍikākhyāṃ dhīmahi etaduktvā tataḥ paścād dhiyo yo naḥ pracodayāt snānīyaṃ devi te tubhyam oṃ hrīṃ śrīṃ nama ityataḥ snānīyaṃ ca tato devyai dadyāllakṣaṇalakṣitam tatastu mūlamantreṇa gandhapuṣpaṃ sadīpakam dhūpādikaṃ pradadyāt tu modakaṃ pāyasaṃ tathā sitāṃ guḍaṃ dadhikṣīraṃ sarpirnānāvidhaiḥ phalaiḥ raktapuṣpaṃ puṣpamālāṃ suvarṇarajatādikam naivedyamuttamaṃ devyā lāṅgalaṃ modakaṃ sitām śāṇḍilyakaratāmrākhyakūṣmāṇḍānāṃ phalāni ca harītakīphalaṃ cāpi nāgaraṅgakamelakām bālapriyaṃ ca yad dravyaṃ kaserukabisādikam toyaṃ ca nārikelasya devyai deyaṃ prayatnataḥ raktaṃ kauśeyavastraṃ ca deyaṃ nīlaṃ kadāpi na devyāḥ priyāṇi puṣpāṇi bakulaṃ keśaraṃ tathā māghyaṃ kahlāravajrāṇi karavīrakuruṇṭakān arkapuṣpaṃ śālmalakaṃ dūrvāṅkuraṃ sukomalam kuśamañjarikā darbhā bandhūkakamale tathā mālūrapattraṃ puṣpaṃ ca trisandhyāraktaparṇake sumanāṃsi priyāṇyetānyambikāyāśca bhairava bandhūkaṃ bakulaṃ māghyaṃ bilvapatrāṇi saṃdhyakam uttamaṃ sarvapuṣpeṣu dravye pāyasamodakau mālyaṃ bandhūkapuṣpasya śivāyai bakulasya vā karavīrasya māghyasya sahasrāṇāṃ dadāti yaḥ sa kāmānprāpya cābhīṣṭān mama loke pramodate candanaṃ śītalaṃ caiva kālīyakasamanvitam anulepanamukhyaṃ tu devyai dadyāt prayatnataḥ karpūraṃ kuṅkumaṃ kūrcaṃ mṛganābhiṃ sugandhikam kālīyakaṃ sugandheṣu devyāḥ prītikaraṃ param yakṣadhūpaḥ pratīvāhaḥ piṇḍadhūpaḥ sagolakaḥ aguru sindhuvāraśca dhūpāḥ prītikarā matāḥ aṅgarāgeṣu sindūraṃ devyāḥ prītikaraṃ param sugandhi śālijaṃ cānnaṃ madhumāṃsasamanvitam apūpaṃ pāyasaṃ kṣīram annaṃ devyāḥ praśasyate ratnodakaṃ sakarpūraṃ piṇḍītakakumārakau rocanaṃ puṣpakaṃ devyāḥ snānīyaṃ parikīrtitam ghṛtapradīpo dīpeṣu praśastaḥ parikīrtitaḥ puṣpāñjalitrayaṃ dadyānmūlamantreṇa śobhanam dattvopacārānakhilānmadhye caitāḥ prapūjayet kāmeśvarīṃ guptadurgāṃ vindhyakandaravāsinīm koṭeśvarīṃ dīrghikākhyāṃ prakaṭīṃ bhuvaneśvarīm ākāśagaṅgāṃ kāmākhyāṃ yadā dikkaravāsinīm mātaṅgīṃ lalitāṃ durgāṃ bhairavīṃ siddhidāṃ tathā balapramathinīṃ caṇḍīṃ caṇḍogrāṃ caṇḍanāyikām ugrāṃ bhīmāṃ śivāṃ śāntāṃ jayantīṃ kālikāṃ tathā maṅgalāṃ bhadrakālīṃ ca śivāṃ dhātrīṃ kapālinīm svāhāṃ svadhāmaparṇāṃ ca pañcapuṣkariṇīṃ tathā damanīṃ sarvabhūtānāṃ manaḥprotsāhakāriṇīm damanīṃ sarvabhūtānāṃ catuḥṣaṣṭiṃ ca yoginīḥ etāḥ sampūjya madhye tu mantreṇāṅgāni pūjayet hṛcchirastu śikhāvarmanetrabāhupadāni ca mūlamantrādyakṣaraistu tribhirādyaṅgapūjanam ekaikaṃ vardhayet paścānmantrāṇyaṅgaughapūjane siddhasūtraṃ ca khaḍgaṃ ca khaḍgamantreṇa pūjayet tato'ṣṭapatramadhye tu pūjayedaṣṭayoginīḥ śailaputrīṃ caṇḍaghaṇṭāṃ skandamātarameva ca kālarātriṃ ca pūrvādicaturdikṣu prapūjayet caṇḍikāmatha kūṣmāṇḍīṃ tathā kātyāyanīṃ śubhām mahāgaurīṃ cāgnikoṇe nairṛtyādiṣu pūjayet mahāmāyāṃ kṣamasveti mūlamantreṇa cāṣṭadhā pūjayet padmamadhye tu balidānaṃ tataḥ param evaṃ yadā kalpavidhānamānaiḥ sampūjyate bhairava kāmadevī tadā svayaṃ maṇḍalametya deyaṃ gṛhṇāti kāmaṃ ca dadāti samyak śrībhagavānuvāca balidānaṃ tataḥ paścātkuryād devyāḥ pramodakam modakair gajavaktraṃ ca haviṣā toṣayedravim tauryatrikaiśca niyamaiḥ śaṃkaraṃ toṣayeddharim caṇḍikāṃ balidānena toṣayet sādhakaḥ sadā pakṣiṇaḥ kacchapā grāhāśchāgalāśca varāhakāḥ mahiṣo godhikā śoṣā tathā navavidhā mṛgāḥ cāmaraḥ kṛṣṇasāraśca śaśaḥ pañcānanastathā matsyāḥ svagātrarudhiraiścāṣṭadhā balayo mahāḥ abhāve ca tathaivaiṣāṃ kadāciddhayahastinau chāgalāḥ śarabhāścaiva naraścaiva yathākramāt balirmahābaliriti balayaḥ parikīrtitāḥ snāpayitvā baliṃ tatra puṣpacandanadhūpakaiḥ pūjayet sādhako devīṃ balimantrairmuhur muhuḥ uttarābhimukho bhūtvā baliṃ pūrvamukhaṃ tathā nirīkṣya sādhakaḥ paścādimaṃ mantramudīrayet varastvaṃ balirūpeṇa mama bhāgyādupasthitaḥ praṇamāmi tataḥ sarvarūpiṇaṃ balarūpiṇam caṇḍikā prītidānena dāturāpadvināśanaḥ vaiṣṇavībalirūpāya bale tubhyaṃ namo namaḥ yajñārthe paśavaḥ sṛṣṭāḥ svayameva svayambhuvā atastvāṃ ghātayāmyadya tasmād yajñe vadho'vadhaḥ oṃ aiṃ hīṃ śrīṃ iti mantreṇa taṃ baliṃ kāmarūpiṇam cintayitvā nyasetpuṣpaṃ mūrdhni tasya ca bhairava tato devīṃ samuddiśya kāmamuddiśya cātmanaḥ abhiṣicya baliṃ paścāt karavālaṃ prapūjayet rasanā tvaṃ caṇḍikāyāṃ suralokaprasādhaka aiṃ hrīṃ śrīṃ iti mantreṇa dhyātvā khaḍgaṃ prapūjayet kṛṣṇaṃ pinākapāṇiṃ ca kālarātrisvarūpiṇam ugraṃ raktāsyanayanaṃ raktamālyānulepanam raktāmbaradharaṃ caikaṃ pāśahastaṃ kuṭumbinam pīyamānaṃ ca rudhiraṃ bhuñjānaṃ kravyasaṃhatim asirviśasanaḥ khaḍgastīkṣṇadhāro durāsadaḥ śrīgarvo vijayaścaiva dharmapāla namo'stu te pūjayitvā tataḥ khaḍgam oṃ āṃ hrīṃ phaḍitimantrakaiḥ gṛhītvā vimalaṃ khaḍgaṃ chedayed balimuttamam tato balīnāṃ rudhiraṃ toyasaindhavasatphalaiḥ madhubhirgandhapuṣpaiśca adhivāsya prayatnataḥ oṃ aiṃ hrīṃ śrīṃ kauśikīti rudhiraṃ dāpayāmi te sthāne niyojayedraktaṃ śiraśca sapradīpakam evaṃ dattvā baliṃ pūrṇaṃ phalaṃ prāpnoti sādhakaḥ hīnaṃ syāddhīnatāmūlaṃ niṣphalaṃ syād viparyayāt balidāne tu durgāyā anyatrāpi vidhiḥ sadā ayameva prayoktavyaḥ sadbhirvetālabhairavau japaṃ samārabhetpaścātpūrvavaddhyānam āsthitaḥ hastena srajamādāya cintayenmanasā śivām cintayitvā guruṃ mūrdhni yathā varṇādikaṃ bhavet mantraṃ ca kaṇṭhato dhyātvā sitavarṇaṃ hiraṇmayam mahāmāyāṃ ca hṛdaye ātmānaṃ gurupādayoḥ ācakṣeta tataḥ paścād gurormantrasya cātmanaḥ devyāścāpyekatāṃ dhyātvā suṣumnāvartmanā tataḥ tattvasvarūpamekaṃ tu ṣaṭcakraṃ pratilambayet ṣaṭcakre'pi mahāmāyāṃ kṣaṇaṃ dhyātvā prayatnataḥ lambayenmūlamātreṇa vādiṣoḍaśacakrakam ādiṣoḍaśacakrasthāṃ sādhakānandakāriṇīm cintayan sādhako devīṃ japakarma samārabhet bhruvorupari nāḍīnāṃ trayāṇāṃ prānta ucyate tatprāntaṃ tripathasthānaṃ ṣaṭkoṇaṃ caturaṅgulam raktavarṇaṃ tu yogajñairājñācakramitīryate kaṇṭhe trayāṇāṃ nāḍīnāṃ veṣṭanaṃ vidyate nṛṇām supumneḍāpiṅgalānāṃ ṣaṭkoṇaṃ tatṣaḍaṅgulam tat ṣaṭcakramiti proktaṃ śuklaṃ kaṇṭhasya madhyagam trayāṇāmatha nāḍīnāṃ hṛdaye caikatā bhavet tatsthānaṃ ṣoḍaśāraṃ syāt saptāṅgulapramāṇataḥ tatprayuktaṃ tu yogajñairādiṣoḍaśacakrakam dhyānānāmatha mantrāṇāṃ cintanasya japasya ca yasmād ādyaṃ tu hṛdayaṃ tasmādādīti gadyate japādau pūjayenmālāṃ toyairabhyukṣya yatnataḥ nidhāya maṇḍalasyāntaḥ savyahastagatāṃ ca vā oṃ māle māle mahāmāye sarvaśaktisvarūpiṇi caturvargastvayi nyastas tasmānme siddhidā bhava pūjayitvā tato mālāṃ gṛhṇīyād dakṣiṇe kare madhyamāyā madhyabhāge varjayitvātha tarjanīm anāmikākaniṣṭhābhyāṃ yutāyā namrabhāgataḥ sthāpayitvā tatra mālāmaṅguṣṭhāgreṇa tadgatam pratyekaṃ bījamādāya japyādardhena bhairava prativāraṃ paṭhenmantraṃ śanairoṣṭhaṃ ca cālayet mālābījaṃ tu japtavyaṃ spṛśennahi parasparam pūrvajāpaprayuktena naivāṅguṣṭhena bhairava pūrvabījaṃ japan yastu parabījaṃ ca saṃspṛśet aṃguṣṭhena bhavet tasya niṣphalastasya tajjapaḥ mālāṃ svahṛdayāsanne dhṛtvā dakṣiṇapāṇinā devīṃ vicintayan japyaṃ kuryād vāmena na spṛśet sphaṭikendrākṣarudrākṣaiḥ putrañjīvasamudbhavaiḥ suvarṇamaṇibhiḥ samyak pravālairathavābjajaiḥ akṣamālā tu kartavyā devīprītikarī parā japedupāṃśu satataṃ kuśagranthyātha pāṇinā mālābījeṣu sarveṣu rudrākṣo matpriyāpriyaḥ rudraprītikarī yasmāt tena rudrākṣarocanī pravālairathavā kuryādaṣṭāviṃśatibījakaiḥ pañcapañcāśatā vāpi na nyūnairadhikaiśca vā rudrākṣairyadi japyeta indrākṣaiḥ sphaṭikaistathā nānyaṃ madhye prayoktavyaṃ putrañjīvādikaṃ ca yat yadyanyat tu prayujyeta mālāyāṃ japakarmaṇi tasya kāmaṃ ca mokṣaṃ ca dadāti na priyaṃkarī miśrībhāvaṃ tato yāti cāṇḍālaiḥ pāpakarmabhiḥ janmāntare jāyate sa vedavedāṅgapāragaḥ eko merustatra deyaḥ sarvebhyaḥ sthūlasambhavaḥ ādyaṃ sthūlaṃ tatastasmānnyūnaṃ nyūnataraṃ tathā vinyaset kramatas tasmāt sarpākārā hi sā yataḥ brahmagranthiyutaṃ kuryāt pratibījaṃ yathāsthitam athavā granthirahitaṃ dṛḍharajjusamanvitam dvirāvṛtyātha madhyena cārdhavṛtyāntadeśataḥ granthiḥ pradakṣiṇāvartaḥ sa brahmagranthisaṃjñakaḥ ātmanā yojayenmālāṃ nāmantro yojayennaraḥ dṛḍhaṃ sūtraṃ niyuñjīta jape truṭyati no yathā yathā hastānna cyaveta japataḥ srak tamācaret hastacyutāyāṃ vighnaṃ syācchinnāyāṃ maraṇaṃ bhavet evaṃ yaḥ kurute mālāṃ japaṃ ca japakovidaḥ sa prāpnotīpsitaṃ kāmaṃ hīne syāttu viparyayaḥ anyatrāpi japenmālāṃ japyaṃ devamanoharam tādṛśaḥ sādhakaḥ kuryānnānyathā tu kadācana yathāśakti japaṃ kuryāt saṃkhyayaiva prayatnataḥ asaṃkhyātaṃ ca yajjaptaṃ tasya tanniṣphalaṃ bhavet japtvā mālāṃ śirodeśe prāṃśusthāne'tha vā nyaset stutipāṭhaṃ tataḥ kuryādiṣṭaṃ kāmaṃ nivedya ca stutiścāpi mahāmantraṃ sādhanaṃ sarvakarmaṇām vakṣye yuvāṃ mahābhāgau sarvasiddhipradāyakam sarvamaṅgalamaṅgalye śive sarvārthasādhike śaraṇye tryambake gauri nārāyaṇi namo'stu te saptadhāvartanaṃ kṛtvā stutimenāṃ ca sādhakaḥ pañcapraṇāmān kṛtvātha aiṃ hrīṃ śrīṃ itimantrakaiḥ anyeṣāṃ purataścaiva adhikaṃ vā yathecchayā yonimudrāṃ tataḥ paścād darśayitvā visarjayet dvau pāṇī prasṛtīkṛtya kṛtvā cottānamañjalim aṃguṣṭhāgradvayaṃ nyasya kaniṣṭhāgradvayostataḥ anāmikāyāṃ vāmasya tatkaniṣṭhāṃ puro nyaset dakṣiṇasyānāmikāyāṃ kaniṣṭhāṃ dakṣiṇasya ca anāmikāyāḥ pṛṣṭhe tu madhyame dve niveśayet dve tarjanyau kaniṣṭhāgre tadagreṇaiva yojayet yonimudrā samākhyātā devyāḥ prītikarī matā trivāraṃ darśayet tāṃ tu mūlamantreṇa sādhakaḥ tāṃ mudrāṃ śirasi nyasya maṇḍalaṃ vinyaset tataḥ aiśānyām agrahastena dvārapadmavivarjitam tatra natvā raktacaṇḍāṃ hrīṃ śrīṃ mantreṇa sādhakaḥ raktacaṇḍāyai nama iti nirmālyaṃ tatra nikṣipet udake tarumūle vā nirmālyaṃ tatra saṃtyajet evaṃ yaḥ pūjayed devīṃ vidhānena śivāṃ naraḥ so 'cireṇa labhetkāmān sarvān eva manogatān ardhalakṣajapaṃ japtvā prathamaṃ caiva sādhakaḥ puraścared viśeṣeṇa nānānaivedyavedanaiḥ kuṇḍaṃ maṇḍalavatkṛtvā cāṣṭamyāṃ samupoṣitaḥ navamyāṃ śuklapakṣasya rajobhiḥ pañcabhirnaraḥ pūrvavanmaṇḍalaṃ kṛtvā gurupitrośca sannidhau anenaiva vidhānena pūjayitvā tu caṇḍikām sahitairbilvapatraiśca aṣṭottaraśatatrayam tilairhomaṃ caret tasyāṃ sahasratritayaṃ japet naivedyaṃ gandhapuṣpe ca vastraṃ dadyācca yatpriyam pūrvoktaṃ cānyadapyasyai pradadyātpāyasaṃ tathā pūjāvasāne deyaṃ syāt tajjātīyaṃ balitrayam sindūraṃ svarṇaratnāni yadyat strīṇāṃ vibhūṣaṇam nivedayed yathāśaktyā puṣpamālyaṃ ca bhūriśaḥ mahāśaktuṃ saśālyannaṃ gavyavyañjanasaṃyutam devyai navamyāṃ sampūrṇaṃ baliṃ dadyād ghṛtādibhiḥ dakṣiṇāṃ gurave dadyātsuvarṇaṃ gāṃ tathā tilam abhiśaptamaputraṃ ca sāvadyaṃ kitavaṃ tathā kriyāhīnamakalpajñaṃ vāmanaṃ gurunindakam sadā matsarasaṃyuktaṃ guruṃ mantreṣu varjayet gururmantrasya mūlaṃ syānmūlaśuddhau tadudgatam saphalaṃ jāyate yasmānmantraṃ yatnātparīkṣayet śāṭhyāt krodhāttu mohādvā nāsanmatyā gurormukhāt kalpeṣu dṛṣṭvā vā mantraṃ gṛhṇīyācchadmanātha vā sa mantrasteyapāpena tāmisre narake naraḥ manvantaratrayaṃ sthitvā pāpayoniṣu jāyate śaṭhe krūre ca mūrkhe ca chadmakāriṇyabhaktike mantraṃ na dūṣite dadyāt subījaṃ vipine tathā lakṣeṇa sādhayet kāmaṃ puraścaraṇapūrvakam pāpakṣayo bhaved yasmāt puraścaraṇakarmaṇā lakṣadvayena mantrasya japena narasattamau trisandhyāsu pratidinaṃ bījasaṃghātakena ca kavirvāgmī paṇḍitaśca yaśasvī ca prajāyate sādhakaḥ sādhakaśreṣṭha pūjāsthānaṃ tataḥ śṛṇu yatra yatra naraḥ pūjāṃ nirjane kurute ca yaḥ tasyādatte svayaṃ devī patraṃ puṣpaṃ phalaṃ jalam śilā praśastā pūjāyāṃ sthaṇḍilaṃ nirjanaṃ tathā japaścopāṃśu sarveṣāmuttamaḥ parikīrtitaḥ aśucirna mahāmāyāṃ pūjayet tu kadācana avaśyaṃ tu smarenmantraṃ yo'tibhaktiyuto naraḥ dantarakte samutpanne smaraṇaṃ ca na vidyate sarveṣāmeva mantrāṇāṃ smaraṇānnarakaṃ vrajet jānūrdhve kṣataje jāte nityaṃ karma na cācaret naimittikaṃ ca tadadhaḥ sravadrakto na cācaret sūtake ca samutpanne kṣurakarmaṇi maithune dhūmodgāre tathā vānte nityakarmāṇi saṃtyajet dravye bhukte tvajīrṇe ca na vai bhuktvā ca kiṃcana karma kuryānnaro nityaṃ sūtake mṛtake tathā patraṃ puṣpaṃ ca tāmbūlaṃ bheṣajatvena kalpitam kaṇādipippalyantaṃ ca phalaṃ bhuktvā na cācaret jalasyāpi naraśreṣṭha bhojanād bheṣajādṛte nityakriyā nivarteta saha naimittikaiḥ sadā jalaukāṃ gūḍhapādaṃ ca kṛmigaṇḍūpadādikam kāmāddhastena saṃspṛśya nityakarmāṇi saṃtyajet viśeṣataḥ śivāpūjāṃ pramītapitṛko naraḥ yāvad vatsaraparyantaṃ manasāpi na cācaret mahāgurunipāte tu kāmyaṃ kiṃcinna cācaret ārtvijyaṃ brahmayajñaṃ ca śrāddhaṃ devayajaṃ ca yat gurumākṣipya vipraṃ ca prahṛtyaiva ca pāṇinā na kuryānnityakarmāṇi retaḥpāte ca bhairava āsanaṃ cārghyapātraṃ ca bhagnamāsādayennatu ūṣare kṛmisaṃyukte sthāne mṛṣṭe'pi nārcayet nīcair āsanamāsādya śuciḥ prayatamānasaḥ arcayeccaṇḍikāṃ devīṃ devamanyaṃ ca bhairava digvibhāge tu kauberīdik śivā prītidāyinī tasmāttanmukha āsīnaḥ pūjayeccaṇḍikāṃ sadā puṣpaṃ ca kṛmisaṃmiśraṃ viśīrṇaṃ bhagnamṛdgate sakeśaṃ mūṣikoddhūtaṃ yatnena parivarjayet yācitaṃ parakīyaṃ ca tathā paryuṣitaṃ ca yat antyasṛṣṭaṃ padā spṛṣṭaṃ yatnena parivarjayet idaṃ śivāyāḥ paramaṃ manoharaṃ karoti yo'nena tadīyapūjanam sa vāñchitārthaṃ samavāpya caṇḍikāgṛhaṃ prayātā nacireṇa bhairava śrībhagavānuvāca asya mantrasya kavacaṃ śṛṇu vetālabhairava vaiṣṇavītantrasaṃjñasya vaiṣṇavyāśca viśeṣataḥ tatra mantrādyakṣaraṃ tu vāsudevasvarūpadhṛk varṇo dvitīyo brahmaiva tṛtīyaścandraśekharaḥ caturtho gajavaktraśca pañcamastu divākaraḥ śaktiṃ svayaṃ pakāraśca mahāmāyā jaganmayī yakārastu mahālakṣmīḥ śeṣavarṇaḥ sarasvatī yoginīpūrvavarṇasya śailaputrī prakīrtitā dvitīyasya tu varṇasya caṇḍikā yoginī matā candraghaṇṭā tṛtīyasya kuṣmāṇḍī tatparasya ca skandamātā takārasya paśya kātyāyanī svayam kālarātriḥ saptamasya mahādevīti saṃsthitā prathamaṃ varṇakavacaṃ yoginīkavacaṃ tathā devaughakavacaṃ paścād devīdikkavacaṃ tathā tatastu pārśvakavacaṃ dvitīyāntāvyayasya ca kavacaṃ tu tataḥ paścāt ṣaḍvarṇaṃ kavacaṃ tathā abhedyakavacaṃ ceti sarvatrāṇaparāyaṇam imāni kavacānyaṣṭau yo jānāti narottamaḥ so'hameva mahādevī devīrūpaśca śaktimān asya vaiṣṇavītantrakavacasya nāradarṣir anuṣṭupchandaḥ kātyāyanī devatā sarvakāmārthasādhane viniyogaḥ aḥ pātu pūrvakāṣṭhāyāmāgneyyāṃ pātu kaḥ sadā pātu co yamakāṣṭhāyāṃ do nairṛtyāṃ ca sarvadā māṃ pātu to'sau pāścātye śaktir vāyavyadiggatā yaḥ pātu māṃ cottarasyāmaiśānyāṃ yastathāvatu mūrdhni rakṣatu māṃ so'sau bāhau māṃ dakṣiṇe tu kaḥ māṃ vāmabāhau caḥ pātu hṛdi ṭo māṃ sadāvatu taḥ pātu kaṇṭhadeśe māṃ kaṭyoḥ śaktistathāvatu yaḥ pātu dakṣiṇe pāde ṣo māṃ vāmapāde tathā śailaputrī tu pūrvasyāmāgneyyāṃ pātu caṇḍikā candraghaṇṭā pātu yāmyāṃ yamabhītivivardhinī nairṛtye tvatha kūṣmāṇḍī pātu māṃ jagatāṃ prasūḥ skandamātā paścimāyāṃ māṃ rakṣatu sadaiva hi kātyāyanī māṃ vāyavye pātu lokeśvarī sadā kālarātrī tu kauberyāṃ sadā rakṣatu māṃ svayam mahāgaurī tathaiśānyāṃ satataṃ pātu pāvanī netrayorvāsudevo māṃ pātu nityaṃ sanātanaḥ brahmā māṃ pātu vadane padmayonir ayonijaḥ nāsābhāge rakṣatu māṃ sarvadā candraśekharaḥ gajavaktraḥ stanayugme pātu nityaṃ harātmajaḥ vāmadakṣiṇapāṇyormāṃ nityaṃ pātu divākaraḥ mahāmāyā svayaṃ nābhau māṃ pātu parameśvarī mahālakṣmīḥ pātu guhye jānunośca sarasvatī mahāmāyā pūrvabhāge nityaṃ rakṣatu māṃ agnijvālā tathāgneyyāṃ pāyānnityaṃ varāsinī rudrāṇī pātu māṃ yāmyāṃ nairṛtyāṃ caṇḍanāyikā ugracaṇḍā paścimāyāṃ pātu nityaṃ maheśvarī pracaṇḍā pātu vāyavye kauberyāṃ ghorarūpiṇī īśvarī ca tathaiśānyāṃ pātu nityaṃ sanātanī ūrdhvaṃ pātu mahāmāyā pātvadhaḥ parameśvarī agrataḥ pātu māmugrā pṛṣṭhato vaiṣṇavī tathā brahmāṇī dakṣiṇe pārśve nityaṃ rakṣatu śobhanā māheśvarī vāmapārśve nityaṃ pāyād vṛṣadhvajā kaumārī parvate pātu vārāhī salile ca mām nārasiṃhī daṃṣṭribhaye pātu māṃ vipineṣu ca aindrī māṃ pātu cākāśe tathā sarvajale sthale setuḥ sarvāṅgulīḥ pātu devādiḥ pātu karṇayoḥ devāntaścibuke pātu pārśvayoḥ śaktipañcamaḥ hā pātu māṃ tathaivorvormāyā rakṣatu jaṅghayoḥ sarvendriyāṇi yaḥ pātu romakūpeṣu sarvadā tvaci māṃ vai sadā pātu māṃ śambhuḥ pātu sarvadā nakhadantakaroṣṭhapādau rāṃ māṃ pātu sadaiva hi devādiḥ pātu māṃ vastau devāntaḥ stanakakṣayoḥ etadādau tu yaḥ seturbāhye māṃ pātu dehataḥ ājñācakre suṣumnāyāṃ ṣaṭcakre hṛdi sandhiṣu ādiṣoḍaśacakre ca lalāṭākāśa eva ca vaiṣṇavī tantramantro māṃ nityaṃ rakṣaṃśca tiṣṭhatu karṇanāḍīṣu sarvāsu pārśvakakṣaśikhāsu ca rudhirasnāyumajjāsu mastiṣkeṣu ca parvasu dvitīyāṣṭākṣaro mantraḥ kavacaṃ pātu sarvataḥ reto vāyau nābhirandhre pṛṣṭhasandhiṣu sarvataḥ ṣaḍakṣarastṛtīyo 'yaṃ mantro māṃ pātu sarvadā nāsārandhre mahāmāyā kaṇṭharandhre tu vaiṣṇavī sarvasandhiṣu māṃ pātu durgā durgārtihāriṇī śrotrayor hūṃ phaḍityevaṃ nityaṃ rakṣatu kālikā netrabījatrayaṃ netre sadā tiṣṭhatu rakṣitum oṃ aiṃ hrīṃ hrauṃ nāsikāyāṃ rakṣantī cāstu caṇḍikā oṃ hrīṃ hūṃ māṃ sadā tārā jihvāmūle tu tiṣṭhatu hṛdi tiṣṭhatu me seturjñānaṃ rakṣitum uttamam oṃ kṣauṃ phaṭ ca mahāmāyā pātu māṃ sarvataḥ sadā oṃ yuṃ saḥ prāṇān kauśikī māṃ prāṇānrakṣatu rakṣikā hrīṃ hūṃ sauṃ bhargadayitā dehaśūnyeṣu pātu mām oṃ namaḥ sadā śailaputrī sarvān rogān pramṛjyatām oṃ hrīṃ saḥ spheṃ kṣaḥ phaḍastrāya siṃhavyāghrabhayādraṇāt śivadūtī pātu nityaṃ hrīṃ sarvāstreṣu tiṣṭhatu oṃ hāṃ hīṃ saścaṇḍaghaṇṭā karṇacchidreṣu pātu mām oṃ krīṃ saḥ kāmeśvarī kāmānabhitiṣṭhatu rakṣatu oṃ āṃ hūṃ phaḍugracaṇḍā ripūn vighnān vimardatām oṃ aṃ śūlātpātu nityaṃ vaiṣṇavī jagadīśvarī oṃ kaṃ brahmāṇī pātu cakrāt ca rudrāṇī tu śaktitaḥ oṃ ṭaṃ kaumārī pātu vajrāttaṃ vārāhī tu kāṇḍataḥ oṃ paṃ pātu nārasiṃhī māṃ kravyādebhyastathāstrataḥ śastrāstrebhyaḥ samastebhyo yantrebhyo'niṣṭamantrataḥ caṇḍikā māṃ sadā pātu yaṃ saṃ devyai namo namaḥ viśvāsaghātakebhyo māmaindrī rakṣatu manmanaḥ oṃ namo mahāmāyāyai oṃ vaiṣṇavyai namo namaḥ rakṣa māṃ sarvabhūtebhyaḥ sarvatra parameśvari ādhāre vāyumārge hṛdi kamaladale candravat smerasūrye vastau vahnau samiddhe viśatu varadayā mantramaṣṭākṣaraṃ tat yadbrahmā mūrdhni dhatte harir avati gale candracūḍo hṛdisthaṃ taṃ māṃ pātu pradhānaṃ nikhilamatiśayaṃ padmagarbhābhabījam ādyāḥ śeṣāḥ svaraughair mamayavalavarair asvareṇāpi yuktaiḥ sānusvārāvisargair hariharaviditaṃ yatsahasraṃ ca sāṣṭam mantrāṇāṃ setubandhaṃ nivasati satataṃ vaiṣṇavītantramantre tanmāṃ pāyātpavitraṃ paramaparamajaṃ bhūtalavyomabhāge aṅgānyaṣṭau tathāṣṭau vasava iha tathaivāṣṭamūrtir dalāni proktānyaṣṭau tathāṣṭau madhumatiracitāḥ siddhayo 'ṣṭau tathaiva aṣṭāvaṣṭāṣṭasaṃkhyā jagati ratikalāḥ kṣiprakāṣṭhāṅgayogā mayyaṣṭāvakṣarāṇi kṣaratu na hi gaṇo yaddhṛdo yastvamūṣām iyi tatkavacaṃ proktaṃ dharmakāmārthasādhanam idaṃ rahasyaṃ paramamidaṃ sarvārthasādhakam yaḥ sakṛcchṛṇuyādetat kavacaṃ mayakoditam sa sarvāṃllabhate kāmān paratra śivarūpatām sakṛd yastu paṭhedetat kavacaṃ mayakoditam sa sarvayajñasya phalaṃ labhate nātra saṃśayaḥ saṃgrāmeṣu jayecchatruṃ mātaṅgāniva keśarī dahettṛṇaṃ yathā vahnistathā śatruṃ dahet sadā nāstrāṇi tasya śastrāṇi śarīre praviśanti vai na tasya jāyate vyādhirna ca duḥkhaṃ kadācana guṭikāñjanapātālapādaleparasāñjanam uccāṭanādyāstāḥ sarvāḥ prasīdanti ca siddhayaḥ vāyor iva matistasya bhaved anyair avāritā dīrghāyuḥ kāmabhogī ca dhanavānabhijāyate aṣṭamyāṃ saṃyato bhūtvā navamyāṃ vidhivacchivām pūjayitvā vidhānena vicintya manasā śivām yo nyaset kavacaṃ dehe tasya puṇyaphalaṃ śṛṇu jitavyādhiḥ śatāyuśca rūpavān guṇavān sadā dhanaratnaughasampūrṇo vidyāvān sa ca jāyate nāgnirdahati tatkāyaṃ nāpaḥ saṃkledayanti ca na śoṣayati taṃ vāyuḥ kravyāt taṃ na hinasti ca śastrāṇi nainaṃ chindanti na tāpayati bhāskaraḥ na tasya jāyate vighno nāsti tasya ca saṃjvaraḥ vetālāśca piśācāśca rākṣasā gaṇanāyakāḥ sarve tasya vaśaṃ yānti bhūtagrāmāścaturvidhāḥ nityaṃ paṭhati yo bhaktyā kavacaṃ haranirmitam so'hameva mahādevo mahāmāyā ca mātṛkā dharmārthakāmamokṣāśca tasya nityaṃ kare sthitāḥ anyasya varadaḥ so 'rthairnityaṃ bhavati paṇḍitaḥ kavitvaṃ satyavāditvaṃ satataṃ tasya jāyate vadecchlokasahasrāṇi bhavecchrutidharastathā likhitaṃ yasya gehe tu kavacaṃ bhairavasthitam na tasya durgatiḥ kvāpi jāyate tasya dūṣaṇam grahāśca sarve tuṣyanti vaśaṃ gacchanti bhūmipāḥ