Madanapālanighaṇṭu

bījaṃ śrutīnāṃ sudhanam munīnāṃ jīvañjaḍānām mahadādikānām āgneyamastram bhavapātakānāṃ kiṃcinmahaḥ śyāmalam āśrayāmi lubdhā kapolamadhuvārimadhuvratālī kumbhasthalīmadhuvibhūṣaṇalohitāṅgī māṇikyamauliriva rājati yasya maulau vighnaṃ sa dhūnayatu vighnapatiḥ sadā vaḥ yo dhvānt…

1. AttributionThe Digital Corpus of Sanskrit (DCS), Oliver Hellwigtextual
2. SourceUpstream TEI document · san · Latnpublished primary

bījaṃ śrutīnāṃ sudhanam munīnāṃ jīvañjaḍānām mahadādikānām āgneyamastram bhavapātakānāṃ kiṃcinmahaḥ śyāmalam āśrayāmi lubdhā kapolamadhuvārimadhuvratālī kumbhasthalīmadhuvibhūṣaṇalohitāṅgī māṇikyamauliriva rājati yasya maulau vighnaṃ sa dhūnayatu vighnapatiḥ sadā vaḥ yo dhvāntasantatigabhīrapayodhimadhyānniṣkāsayatyaśaraṇam bhuvanaṃ nimajjat dattvā jagattrayahitaḥ svakarāvalambaṃ vāñchāṃ sa vo dinakaraḥ saphalīkarotu mithyāśanādi kṛtadoṣacayādrikopanadyambuvardhita upadravanakrabhīme rogāmbudhau bhavajanasya nimajjato yaḥ potaḥ prayacchatu śubhāni sa kāśirājaḥ kecitsanti nighaṇṭavo'tilaghavaḥ kecinmahāntaḥ pare kecid durgamanāmakāḥ katipaye bhāvasvabhāvojjhitāḥ tasmānnātilaghurna cātivipulaḥ khyātādināmā satām prītyai dravyaguṇānvito'yamadhunā grantho mayā badhyate sarvaṃ kāyena saṃsādhyaṃ tasyāyuḥ sthitikāraṇam āyurvedopadeśastu kasya na syātsukhāvahaḥ tatrāpi pūrvaṃ jñātavyā dravyanāmaguṇāguṇāḥ atasta eva vakṣyante tajjñāne hi kriyākramaḥ harasya bhavane jātā haritā ca svabhāvataḥ harate sarvarogāṃśca tena proktā harītakī jīvantī pūtanā paścādamṛtā vijayābhayā rohiṇī cetakī saptabhedabhinnā harītakī jīvantī jīvanodyogātpāvanātpūtanā matā sudhāvadamṛtā jñeyā vijayā vijayapradā nṛṇāmabhayadā yasmādabhayā tatprakīrtitā rohiṇī tu guṇārohāccetanāccetakī matā jīvantī svarṇavarṇābhā pūtanāsthimatī amṛtā tridalā proktā vijayā tumbarūpiṇī pañcāṅgī tvabhayā jñeyā matā vṛttā tu rohiṇī tryaṅgī cetakī jñeyā karma tāsāmathocyate sarvarogeṣu jīvantī pralepe pūtanā hitā śuddhyarthamamṛtā proktā vijayā sarvarogahṛt akṣiroge 'bhayā śastā rohiṇī vraṇarohiṇī cetakī cūrṇayoge syātsaptadhaivam prakīrtitā śoṇācchinnā guḍanibhā kiṃcidamlā kaṣāyiṇī sthūlatvak sarasā svalpabījā gurvī harītakī carvitā vardhayatyagniṃ peṣitā malaśodhinī svinnā saṃgrāhiṇī proktā bhṛṣṭā pathyā tridoṣanut grīṣme tulyaguḍāṃ susaindhavayutāṃ meghāvanaddhāmbare sārddhaṃ śarkarayā śaradyamalayā śuṇṭhyā tuṣārāgame pippalyā śiśire vasantasamaye kṣaudreṇa saṃyojitāṃ rājanprāpya harītakīmiva gadā naśyantu te śatravaḥ śivā harītakī pathyā cetakī vijayā jayā prapathyā pramathāmoghā kāyasthā prāṇadāmṛtā jīvanīyā haimavatī pūtanā pṛtanābhayā vayasthā nandinī jñeyā śreyasī rohiṇī tathā harītakī pañcarasālavaṇā tuvarotkaṭā rūkṣoṣṇā dīpanī medhyā svādupākā rasāyinī sarā buddhipradāyuṣyā cakṣuṣyā bṛṃhaṇī laghuḥ śvāsakāsapramehārśaḥkuṣṭhaśophodarakṛmīn vaisvaryagrahaṇīdoṣavibandhaviṣamajvarān gulmādhmānavraṇacchardihikkākaṇḍūhṛdāmayān kāmalāṃ śūlam ānāhaṃ plīhānaṃ cāpakarṣati madhurāmlatayā vātaṃ kaṣāyasvādubhāvataḥ pittaṃ hanti kaphaṃ tadvatkaṭutvena harītakī adhvātikhinnaḥ parihīnatejā rūkṣaḥ kṛśo laṅghanakarśitaśca pittādhiko garbhavatī ca nārī jvaryalpavīryastvabhayāṃ na khādet dhātrīphalāmṛtaphalāmalakaṃ śrīphalaṃ śivam tadvad dhātrīphalaṃ vṛṣyaṃ viśeṣād raktapittajit amlatvāt pavanaṃ hanti pittam mādhuryaśaityataḥ kaphaṃ rūkṣakaṣāyatvāt tasmāt kim adhikam phalam kuryātpittaṃ tadamlatvāt kapham mādhuryaśaityataḥ vātaṃ rūkṣakaṣāyatvād evaṃ kiṃ na viparyayaḥ dhātryāstridoṣahantṛtvaṃ śaktyaiva munibhiḥ smṛtam sambhāvanāvaśāduktā rasāderapi hetutā vibhītakaḥ karṣaphalo bhūtāvāsaḥ kalidrumaḥ vāsanto 'kṣo vindhyajātaḥ saṃvartastilapuṣpakaḥ vibhītakaḥ svādupākaḥ kaṣāyaḥ kaphapittanut uṣṇavīryo himasparśo bhedanaḥ kāsanāśanaḥ rūkṣo netrahitaḥ keśyo majjāto madakārakaḥ triphalaitattrayeṇa syādvarā śreṣṭhā phalottamā triphalā kuṣṭhamehāsrakaphapittavināśinī cakṣuṣyā ropaṇī hṛdyā vayasaḥ sthāpanī sarā bhūdhātrī bahupatrā syājjaṭātāmalakī śivā bhūdhātrī vātakṛttiktā kaṣāyā madhurā himā pipāsākāsapittāsrakaphapāṇḍukṣatāpahā prācīnāmalakam prācī nāgaraṃ raktakam matam tatpakvam pittakaphakṛcchuṣkaṃ guru samīrajit vāsā vṛṣaḥ siṃhamukho bhiṣaṅmātā 'ṭarūṣakaḥ śuklā haimavatī caiva siṃhī syād vājidantikā vāsako vātakṛt svaryaḥ kaphapittāsranāśanaḥ śvāsakāsajvaracchardimehakuṣṭhakṣayāpahaḥ guḍūcī kuṇḍalī chinnā vayasthāmṛtavallarī chinnodbhavā chinnaruhāmṛtakandā vilāsinī vatsādanī candrahāsā jīvantī cakralakṣaṇā guḍūcī kaṭukā laghvī svādupākā rasāyanī saṃgrāhiṇī kaṣāyoṣṇā vṛṣyā tiktāgnidīpanī kāmalākuṣṭhavātāsṛgjvarapittakṛmīn jayet ghṛtena vātaṃ saguḍā vibandham pittaṃ sitāḍhyā madhunā kaphaṃ ca vātāsram ugraṃ rubutailamiśrā śuṃṭhyāmavātaṃ śamayed guḍūcī bilvaḥ śalāṭuḥ śailūṣo mālūraśca sadāphalaḥ lakṣmīphalo gandhagarbhaḥ śāṃḍilyaḥ kaṇṭakī mataḥ bilvaṃ grāhi kaṣāyoṣṇaṃ kaṭu dīpanapācanam hṛdyam bālaṃ laghu snigdhaṃ tiktaṃ vātakaphāpaham vṛddhaṃ guru tridoṣaṃ syāddurjaram pūtimārutam vidāhi viṣṭambhakaraṃ madhuraṃ vahnimāndyakṛt grahaṇīkaphavātāmaśūlaghnī bilvapeśikā agnimantho jayaḥ keturaraṇirvaijayantikā agnimanthaḥ śvayathuhṛd vīryoṣṇaḥ kaphavātanut pāṭalā kāmadūtī syātkumbhīkā kālavṛntikā sthālyamoghā madhodūrtī tāmrapuṣpāmbuvāsinī anyā phaleruhā śvetā kumbhīkā kāṣṭhapāṭalā pāṭalāruciśophārśaḥśvāsatṛṭchardināśinī anuṣṇaṃ tuvaraṃ svādu tatpuṣpaṃ kapharaktanut pittātisāradāhaghnaṃ phalaṃ hikkāsrapittajit kāśmīrī sarvatobhadrā śrīparṇī kṛṣṇavṛntikā gambhārī kāśmarī hīrā kāśmaryo bhadraparṇikā kāśmarī jvaraśūlaghnī vīryoṣṇā madhurā guruḥ tatpuṣpaṃ vātalaṃ grāhi pittāsṛkpradarāpaham phalaṃ rasāyanaṃ keśyaṃ bṛṃhaṇaṃ śukralaṃ guru vātapittakṣayatṛṣṇāraktamūtravibandhanut śyonākaḥ pṛthuśiṃbaḥ syācchukanāsaḥ kuṭannaṭaḥ bhūtavṛkṣaścakaṭvaṅgaṣ ṭuṇṭukaḥ śalako'raluḥ mayūrajaṃgho bhallūkaḥ priyañjīvaḥ kaṭambharaḥ śyonāko dīpanaḥ pāke kaṭus tuvarako himaḥ grāhī tikto'nilaśleṣmapittakāsāmanāśanaḥ bilvādibhiḥ pañcabhirebhiretaiḥ syātpañcamūlaṃ mahadagnikāri laghūṣṇatiktaṃ rasataḥ kaṣāyam medaḥkaphaśvāsasamīrahāri gokṣurastrikaṭaḥ kaṇṭaphalaḥ syāt svādukaṇṭakaḥ gokaṇṭako bhakṣyakaṇṭas trikaṇṭo vyāladaṃṣṭrakaḥ śvadaṃṣṭraḥ sthalaśṛṅgāṭaḥ ṣaḍaṅgaḥ kṣurakastrikaḥ gokṣuraḥ śītalaḥ svādur balakṛd vastiśodhanaḥ pramehaśvāsakāsāśmakṛcchrahṛdrogavātajit śāliparṇī dhruvā saumyā triparṇī pītanī sthirā vidārigandhātiguhā dīrghamūlāṃśumatyapi śāliparṇī guruśchardijvaraśvāsātisāranut śoṣadoṣatrayaharā bṛṃhaṇyuṣṇā rasāyinī pṛṣṭhiparṇī kroṣṭupucchī dhāvanī kalaśī guhā śṛgālavṛntāṅghribalā pṛthakparṇī ca parṇikā pṛśniparṇī laghur vṛṣyā madhuroṣṇā vināśayet raktātisāratṛḍdāhadoṣatrayavamijvarān bṛhatī sthūlabhaṇṭākī viśadā ca mahoṭikā vārtākī mahatī siṃhī kaṇṭakī rāṣṭrikā kulī bṛhatī grāhiṇī hṛdyā pācanī kaphavātajit uṣṇā kuṣṭhajvaraśvāsaśūlakāsāgnimāndyahṛt kaṇṭālikā kaṇṭakinī kaṇṭakārī nidagdhikā duḥsparśā dhāvanī kṣudrā syād vyāghrī duḥpradharṣiṇī sitakṣudrā candrahāsā lakṣmaṇā kṣetradūtikā kaṇṭakārī sarā tiktā kaṭukā dīpanī laghuḥ rūkṣoṣṇā pācanī kāsaśvāsajvarakaphānilān nihanti pīnasam pārśvapīḍākṛcchrahṛdāmayān tadvatproktā sitakṣudrā viśeṣād garbhakāriṇī hrasvākhyam pañcamūlaṃ syāt pañcabhir gokṣurādibhiḥ balyam pittānilaharaṃ nātyuṣṇaṃ svādu bṛṃhaṇam etābhyāṃ pañcamūlābhyāṃ daśamūlamudāhṛtam doṣatrayaśvāsakāsaśiraḥpīḍāpatantrakān tandrāsvedajvarānāhārucipārśvarujo jayet ṛddhiḥ sukhaṃ yugaṃ lakṣmīḥ siddhiḥ sarvajanapriyā ṛṣiśreṣṭhā rathāṅgī syān maṅgalā śrāvaṇī vasuḥ yogyaṃ yugyā tuṣṭirāśir vṛddhirapyetadāhvayā ṛddhir balyā tridoṣaghnī śukralā madhurā guruḥ vṛddhirgarbhapradā śītā vṛṣyā kāsakṣayāmanut kākolī madhurā vīrā kāyasthā kṣīraśuklikā dhvāṃkṣolī vāyasolī syāt svādumāṃsī payasvinī dvitīyā kṣīrakākolī śatāhvā kṣīriṇī matā kākolīyugalaṃ śītaṃ śukralam madhuraṃ guru jayet samīradāhāsrapittaśoṣatṛṣājvarān medā jñeyā śāliparṇī divyā medobhavādhvarā mahāmedā vasucchidrā nṛdantī devatāmaṇiḥ medāyugmaṃ guru svādu vṛṣyaṃ stanyakaphāvaham bṛṃhaṇaṃ śītalam pittaraktakṣayasamīranut jīvako madhuraḥ śṛṅgī hrasvāṅgaḥ kūrcaśīrṣakaḥ ṛṣabho dhīra indrākṣo viṣāṇī durdharo vṛṣaḥ jīvakarṣabhakau balyau śītau śukrakaphapradau harataḥ pittadāhāsrakārśyavātakṣayāmayān aṣṭavargo 'ṣṭabhir dravyair etaiḥ śīto'tiśukralaḥ bṛṃhaṇaḥ pittadāhāsraśoṣaghnaḥ stanyagarbhakṛt jīvantī jīvanī jīvā jīvanīyā yaśaskarī śākaśreṣṭhā jīvabhadrā maṅgalyā jīvavardhinī jīvantī śītalā svāduḥ snigdhā doṣatrayāpahā rasāyanī balakarī cakṣuṣyā grāhiṇī laghuḥ madhuyaṣṭī klītanakaṃ yaṣṭīmadhu madhūlikā yaṣṭyāhvam madhukaṃ yaṣṭīmadhukaṃ jalajā madhu madhuyaṣṭī guruḥ śītā balyā tṛṭchardipittanut māṣaparṇī kṛṣṇavṛntā kāmbojī hayapucchikā māṃsamāṣā siṃhamukhī svādumāṣā mahāsahā mudgaparṇī kṣudrasahā śūrpaparṇī kuraṅginī vanajā riṅgaṇī śivī siṃhī mārjāragandhikā māṣaparṇī himā tiktā rūkṣā śukrabalāsakṛt madhurā grāhiṇī śoṣavātapittajvarāsranut tadvadbhavenmudgaparṇī tridoṣāsraharā laghuḥ jīvantī śūrpaparṇīyuk kākolyau jīvakarṣabhau medāyaṣṭīti madhuro jīvanīyo gaṇaḥ smṛtaḥ śukrakṛd bṛṃhaṇaḥ śītaḥ stanyagarbhakaphapradaḥ raktapittatṛṣāśoṣajvaradāhakṣatāpahaḥ eraṇḍo dīrghadaṇḍaḥ syāt taruṇo vardhamānakaḥ citraḥ paṃcāṅgulo vyāghrapuccho gandharvahastakaḥ raktairaṇḍo hastikarṇo vyāghro vyāghrataloruvuḥ uttānapattro durvāta āmavairī ca cañculaḥ eraṇḍayugmam madhuram uṣṇaṃ guru vināśayet śophakaṭīvastiśiraḥpīḍodarajvarān bradhnaśvāsakaphānāhakāsakuṣṭhāmamārutān tatphalam bhedanaṃ svādu śāramuṣṇaṃ samīrajit sārivā śāradā sphotā gopakanyā pratānikā gopāṅganā gopavallī latāhvā kāṣṭhasārivā sārivānyā kṛṣṇamūlī bhadrā candanasārivā sārivāyugalaṃ svādu snigdhaṃ śukrakaraṃ guru doṣatrayāsrapradarajvarātīsāranāśanam yāso marudbhavo 'nantā dīrghamūlo yavāsakaḥ bālapattraḥ samudrānto dūramūlo 'tikaṇṭakaḥ dhanvayāsas tāmramūlī duḥsparśā syād durālabhā vāsakaḥ kacchurā tāmramūlā dhanvayavāsakaḥ yāsaḥ svāduḥ sarastikto himaḥ pittaharo laghuḥ hanti raktakaphabhrāntīs tadvaddhanvayavāsakaḥ muṇḍī bhikṣuḥ parivrājī śrāvaṇī syāt tapodhanā śrāvaṇā śrīmatī muṇḍā tiktā śravaṇaśīrṣakā muṇḍī tiktā kaṭuḥ pāke vīryoṣṇā madhurā laghuḥ medhyā gaṇḍāpacīchardikṛmiyonyartipāṇḍujit mahāmuṇḍī lobhanīyā chinnagranthinikā matā bhūtavṛkṣā kulahalālambuṣā bhūkadambikā kadambapuṣpī muṇḍīvad guṇair bhūmikadambakaḥ apāmārgastu śikharī kiṇihī kharamañjarī adhaḥśalyaḥ śaikharikaḥ pratyakpuṣpī mayūrakaḥ apāmārgaḥ saras tīkṣṇo dīpanaḥ kaphavātanut nihanti dadrusidhmārśaḥkaṇḍūśūlodarāpacīḥ anyo rakto vṛttaphalo vaśiraḥ kapipippalī apāmārgo 'ruṇo vātaviṣṭambhī kaphanāśanaḥ ūnaḥ pūrvaguṇai rūkṣas tatpatraṃ raktapittajit kampillo rocano raktacūrṇako vraṇaśodhanaḥ lohito raktaśamano recī rañjanako mataḥ kampillaḥ kaphapittāsrakrimigulmodaravraṇān hanti recī kaṭūṣṇaśca tacchākaṃ grāhi śītalam dantī ghuṇapriyā nāgadantī śīghrānukūlinī upacitrā nikumbhā syād viśalyodumbaracchadā ākhuparṇī viṣairaṇḍā dravantī śambarī matā mūsikāhvā sutaśreṇī pratyakśreṇī ca phañjikā dantīdvayaṃ saram pākarasayoḥ kaṭu dīpanam tīkṣṇoṣṇaṃ hanti pittāsrakaphaśophodarakṛmīn jayapālo dantibījaṃ khyātaṃ tat tittirīphalam jayapālo guruḥ snigdho recī pittakaphāpahaḥ mūrvā madhurasā devī pṛthakparṇī triparṇyapi devaśreṇī svādurasā snigdhaparṇī ca moraṭā jālinī dīpanī tiktavalkalā ca pṛthaktvacā madhuśravā madhuśreṇī sruvā madhumatī ca sā laghuparṇī madhūlī ca pīluparṇī ca pīlunī gopavallī tejanī ca mūrvā vṛṣyā balapradā śleṣmakṛt pittavātaghnī grāhiṇī gulmanāśinī tṛvṛt kumbhāruṇā tryasrā bhaṇḍī koṭaravāsinī sarvānubhūtis trivṛtā tripuṭā saralā sitā tṛvṛt tiktā sarā rūkṣā svādur uṣṇā samīranut kaṭuḥ pāke jvaraśleṣmapittaśophodarāpahā tṛvṛt kālā kālameṣī kālaparṇyardhacandrikā suṣeṇā syānmālavikā masūravidalā matā tṛvṛt kālā hīnaguṇā tasyās tīvravirecinī mūrcchādāhamadabhrāntikaṇṭhotkarṣaṇakāriṇī aindravāruṇyathendrāhvā vṛṣabhākṣī gavādinī indravāruḥ kṣudraphalā viśālaindrī vṛṣādinī anyendravāruṇī citraphalā citrā mahāphalā ātmarakṣā nāgadantī trapusī gajacirbhaṭī śvetapuṣpāmṛgākṣī ca tathā yakṣasurā matā marudbhavā kṛmīkumbhā citrā devī ca kīrtitā indravārudvayaṃ tiktaṃ kaṭu pāke saraṃ laghu vīryoṣṇaṃ kāmalāpittakaphaplīhodarāpaham āragvadho rājavṛkṣaḥ śamyākaḥ kṛtamālakaḥ vyādhighātaḥ karṇikāraḥ pragrahaś canuraṅgulaḥ ārogyaśimbī svarṇadruḥ karṇī dīrghaphalo mataḥ āragvadho guruḥ svāduḥ śītalomṛdurecanaḥ jvarahṛdrogapittāsravātodāvartaśūlajit tatpuṣpaṃ vātalaṃ grāhi tiktam pittakaphāpaham tanmajjā madhuraḥ pāke snigdhaḥ pittasamīrajit nīlinī nīlikā grāmyā śrīphalā bhāravāhinī rañjinī kālikā melā tūṇī tutthā viśodhinī nālinī recanī tiktā keśyā mohabhramāvahā uṣṇā hantyudaraplīhavātaraktakaphānilān kaṭukā rohiṇī tiktā cakrāṅgā kaṭurohiṇī matsyapittā kāṇḍaruhā kṛṣṇabhedā dvijāṅgikā aśokarohiṇī matsyaśakalā śakulādinī kaṭukī kaṭukā pāke tiktā rūkṣā sarā laghuḥ himā hanti kṛmiśvāsadāhapittakaphajvarān aṅkollakas tāmraphalaḥ pītasāro nikocakaḥ guptasneho virecī syād bhūsutā dīrghakīlakaḥ aṅkollakaḥ kaṭuḥ snigdhastīkṣṇoṣṇas tuvaro laghuḥ recanaḥ kṛmiśūlāmaśoṣaśleṣmaviṣāpahaḥ tatphalaṃ śītalaṃ svādu śleṣmalam bṛṃhaṇaṃ guru balyaṃ virecanaṃ vātapittadāhakṣayāsrajit sehuṇḍo vajratuṇḍastu gaṇḍīro vajradaṇḍakaḥ snuhī samantadugdhāsipattro vajrī mahātaruḥ sehuṇḍo recanas tīkṣṇo dīpanaḥ kaṭuko guruḥ śūlāmāṣṭhīlikādhmānagulmaśophodarānilān hanti dūṣīviṣaplīhakuṣṭhonmādāśmapāṇḍutāḥ nimbo niyamano netāriṣṭaḥ syāt pāribhadrakaḥ sutiktaḥ sarvatobhadraḥ picumandaḥ subhadrakaḥ nimbaḥ śīto laghur grāhī kaṭupāko 'gnivātakṛt vraṇapittakaphacchardikuṣṭhahṛllāsamehanut nimbapatraṃ smṛtaṃ netryaṃ kṛmipittaviṣapraṇut vātalaṃ kaṭupākaṃ ca sarvārocakakuṣṭhanut apakvam pācayennimbaṃ pakvaṃ ca pariśodhayet tatphalam bhedanaṃ snigdhamuṣṇaṃ kuṣṭhaharaṃ laghu mahānimbo nimbavaraḥ kārmuko viṣamuṣṭikaḥ ramyako girikodrekaḥ kṣīraḥ syāt keśamuṣṭikaḥ kaivartaḥ śākaśālaśca giripattraḥ supārśvakaḥ mahānimbo himo rūkṣas tikto grāhī kaṣāyakaḥ kaphapittakṛmichardikuṣṭhahṛllāsaraktajit kirātatiktaḥ kairāto bhūnimbo rāmasenakaḥ kirātatiktako haimaḥ kāṇḍatiktaḥ kirātakaḥ naipālaḥ kathitaścānyo jātibhedo jvarāntakṛt nāḍītikto'rdhatiktaḥ syānnidrāriḥ sannipātahā kirāto vātalo rūkṣaḥ śītas tiktako laghuḥ sannipātajvaraśvāsakaphapittāsradāhanut saro laghuḥ tiktahimo balāsapittāsraśophajvarakāsatṛḍghnaḥ bhūnimbo vātalo rūkṣaḥ kaphapittajvarāpahaḥ kuṭajaḥ kūṭajaḥ koṭī vatsako girimallikā kaliṅgo mallikāpuṣpa indravṛkṣo'tha vṛkṣakaḥ tucchako varatiktaśca śakradruḥ pāṇḍuradrumaḥ śatakratudrumaḥ kośī nīlayaṣṭiśca mallikā kuṭajaḥ kaṭuko rūkṣo dīpanas tuvaro himaḥ arśo'tisārapittāsrakaphatṛṣṇāmakuṣṭhanut phalāni tasyendrayavāḥ śakrāhvaṃ ca kaliṅgakam tathā vatsakabījāni proktā bhadrayavās tathā indrayavas tridoṣaghnaḥ saṃgrāhī śītalaḥ kaṭuḥ jvarātisāraraktārśaḥkṛmikuṣṭhavisarpanut madanaś chardano rāṭhaḥ piṇḍī piṇḍītakaḥ phalaḥ tagaraḥ karahāṭaśca śalyako viṣapuṣpakaḥ snehapiṇḍītakaścaiva bastiśodhana eva ca chardano vāmanaścaiva sa ca gālaḥ prakīrtitaḥ madano vāntikṛcchrotravraṇastrāvavināśanaḥ rūkṣaḥ kuṣṭhakaphānāhaśophagulmavraṇāpahaḥ kaṅkuṣṭhakaṃ kākakuṣṭhaṃ recanaṃ raṅganāyakam varāṅgapupulakaṃ hāsaṃ śodhanaṃ kiñjavālukam kaṅkuṣṭhaṃ recanaṃ tiktaṃ kaṭūṣṇaṃ varṇakārakam kṛmiśothodarādhmānagulmānāhakaphāpaham hemāhvā kanakakṣīrī hemakṣīrī ca kāñcanī kṣīriṇī kāñcanakṣīrī kaṭuparṇī ca karṣiṇī tiktā haimavatī dugdhā hemadugdhā himāvatī svarṇakṣīrī svarṇadugdhā suvarṇakṣīrikāpi ca pītadugdhā haimavatī tiktadugdhā himādrijā hemāhvā recanī tiktā mādinyutkleśakāriṇī kṛmipāṇḍukaphānāhaviṣakuṣṭhavināśinī sātalā saptalā sārā vidulā vimalā matā bahuphenā carmakasā phenā dīptā tu nālikā sātalā kaṭukā pāke vātalā śītalā laghuḥ tiktā śophakaphānāhapittodāvartaraktajit aśmantako yugmapattraḥ kuśalī pāpanāśanaḥ ślakṣmatvag aśmayoniḥ syāt pāṣāṇāntaka eva ca dvitīyo 'śmantakaścaiva guṇatastu smṛto 'nyathā aśmantastuvaro grāhī śītoṣṇaḥ kaphavātajit nihanti galagaṇḍāsragaṇḍamālāgalāmayān tatphalaṃ lekhanaṃ grāhi guru śleṣmānilāpaham tanmaṣī śastraghāte tu śreṣṭhā ca vraṇaropaṇe kāñcanāraḥ kāñcanakaḥ pākārī raktapuṣpakaḥ kovidāro'sya bhedaḥ syātkuddālaḥ kuṇḍalī kulī tāmrapuṣpaś camariko mahāyamalapattrakaḥ āsphotoddālakaḥ svalpakeśaraśca kulāhalaḥ kāñcanāro himo grāhī tuvaraḥ śleṣmapittajit kṛmikuṣṭhagudabhraṃśagaṇḍamālāvraṇāpahaḥ kovidāro'pi tadvatsyāt puṣpaṃ śītaṃ tayorlaghu rūkṣaṃ saṃgrāhi pittāsrapradarakṣatakāsanut nirguṇḍī śvetakusumā sindukaḥ sinduvārakaḥ bhūtakeśyaparo nīlasinduko nīlapuṣpakaśephālikā śītabhīrur varṇako nīlamañjariḥ nirguṇḍī smṛtidā tiktā kaṣāyā kaṭukā laghuḥ keśyā netrahitā hanti śūlaśothāmamārutān kṛmikuṣṭhānilaśleṣmavraṇāruciviṣāpahā ajaśṛṅgī meṣaśṛṅgī sarpadaṃṣṭrā ca kīrtitā tiktadugdhākṣibhaiṣajyaṃ putraśreṇī viṣāṇikā matā sā vṛścikālīti trapusīmapare jaguḥ uṣṭrī lomaśapuṣpā ca dhīvṛkṣā ghanaśṛṅgikā viṣaghnā pādavṛkṣaśca kālī cakṣuṣya eva ca vāmāvartā viṣaharī kālikā netrabheṣajā sakṣīrā karkaśā yugmaphalā cottaravāhinī māṣaparṇyalparomā ca meṣavallīti kīrtitā dvitīyā dakṣiṇāvartā vṛścikālī viṣāṇikā aparā vṛścikā pattrī tathā carmakavṛntikā badarā meghapuṣpā ca tathā bhāsurapuṣpikā kāsajidvātaśamanī vṛścikālī viṣāpahā punarnavā viśākhaśca raktapuṣpā śivāṭikā krūrakaḥ kṣudravarṣābhūr dīrghapattraśca kṣudrakaḥ punarnavā sarā tiktā rūkṣoṣṇā madhurā kaṭuḥ śophānilavraṇaśleṣmaharā rucyā rasāyanī punarnavāruṇā tiktā raktapuṣpā kaṭhillakaḥ krūrakaḥ kṣudravarṣābhūr varṣaketuḥ śivāṭikā punarnavāruṇā tiktā kaṭupākā himā laghuḥ vātalā grāhiṇī śleṣmaraktavidradhināśinī rāsnā raktā yuktarasā rasanā gandhanākuliḥ sugandhimūlātirasā śreyasī subahā rasā rāsnāmapācanī tiktā gurūṣṇā śleṣmavātajit śophaśvāsasamīrāsravātaśothodarāpahā aśvagandhā turaṅgāhvā gokarṇāśvāvarohakaḥ vārāhakarṇī varadā balyā vājīkarī vṛṣā aśvagandhānilaśleṣmaśophaśvitrakṣayāpahā balyā rasāyanī tiktā kaṣāyoṣṇātiśukralā prasāriṇī rājabalā cāruparṇī pratānikā saraṇī sāraṇī bhadraparṇī suprasarā sarā prasāriṇī gururvṛṣyā vartmasandhānakṛtsarā vīryoṣṇā vātanuttiktā vātaraktakaphāpahā śatāvarī dvīpiśatrur dvīpikādharakaṇṭakā nārāyaṇī śatapadī śatāhvā bahupattrikā śatāvarī guruḥ śītā svāduḥ snigdhā rasāyanī śukrastanyakarā balyā vātapittāsraśophajit śatāvaryūrdhvakaṇṭānyā pīvarīndīvarī abhīrur bahupattrā ca mahāpuruṣadantikā sahasravīryā keśī syāttuṅginī sūkṣmapattrikā mahāśatāvarī medhyā hṛdyā rasāyanī śītavīryā nihantyarśograhaṇīnayanāmayān balā vāṭyālakā śītapākī vāṭyodanāhvayā bhadraudanī samaṅgā syātsamāṃśā kharayaṣṭikā mahābalā vīrapuṣpī sahadevī bṛhadbalā vāṭyāyinī devasahā vāṭyā syātpītapuṣpikā gandhavarṇā mahāgandhā varṣāpuṣpā prasādinī bālikātibalā bhāradvājī syād akṣagandhinī gāṅgerukī nāgabalā viśvedevā gavedhukā balācatuṣṭayaṃ śītaṃ madhuram balakāntikṛt snigdhaṃ grāhi samīrāsrapīnasakṣatanāśanam āsām bṛhadbalā kṛcchraṃ hanti vātānulominī gurvī nāgabalā vṛṣyā viśeṣād raktapittajit balyā rasāyanī puṃstvavardhinī bṛṃhaṇī tathā tasyāḥ phalaṃ himaṃ svādustambhanaṃ guru lekhanam nibandhādhmānajananaṃ raktapittanibarhaṇam tejasvinī tejavatī tejinyalaghuvalkalā mahaujasī pārijātā śītā tiktātitejinī tejasvinī kaphaśvāsakāsāsyāmayavātajit pācanyuṣṇā kaṭustiktā rucivahnipradīpanī jyotiṣmatī vahniruciḥ kaṅganī kaṭabhī tathā jyotiṣmatī kaṭustiktā sarā kaphasamīrajit atyuṣṇā dāmanī tīkṣṇā vahnibuddhismṛtipradā devadāruḥ surāhvaṃ syādbhadradāru suradrumaḥ bhadrakāṣṭhaṃ snehavṛkṣaḥ kilimaṃ śakradāru ca devadāru kaṭusnigdhaṃ tiktoṣṇaṃ laghu nāśayet ādhmānajvaraśoṣāmahikkākaṇḍūkaphānilān saralo nandanaścīḍo nameru darpivṛkṣakaḥ pītadāruḥ pītavṛkṣo mahādīrghaḥ kalidrumaḥ saralaḥ kaṭukaḥ pāke rasato madhuro laghuḥ uṣṇaḥ snigdhaḥ samīrākṣikaṇṭhakarṇāmayāpahaḥ puṣkarāhvam padmapattraṃ pauṣkaram puṣkarāṅghrikam kāśmīram puṣkarajaṭā mūlaṃ vīraṃ sugandhikam pauṣkaraṃ kaṭukaṃ tiktam uṣṇaṃ vātakaphajvarān hanti śophāruciśvāsān viśeṣāt pārśvaśūlajit kuṣṭhaṃ rogāhvayaṃ vāpyaṃ kauberam pāribhadrakam pārihāryam pāribhāvyamutpalaṃ haribhadrakam kuṣṭhamuṣṇaṃ kaṭu svādu śukrapradaṃ laghu hanti vātāsravīsarpakāsakuṣṭhamarutkaphān śṛṅgī kulīraśṛṅgī syādvakrā karkaṭaśṛṅgikā karkaṭākhyā mahāghoṣā śṛṅganāmnī natāṅgyapi śṛṅgī kaṣāyā tiktoṣṇā hanti hidhmāvamijvarān tṛṣṇābhramakaphaśvāsakṣayakāsordhvamārutān rohiṣaṃ kattṛṇam bhūtir bhūtīkaṃ saralaṃ tṛṇam śyāmalaṃ yugdalam pauraṃ dhyāmakaṃ devagandhakam rohiṣaṃ kaṭukam pāke tiktoṣṇaṃ tuvaraṃ jayet kaṇṭhahṛdrogapittāsraśūlakāsakaphajvarān kaṭphalaṃ kumudā kumbhī śrīparṇī somapādapaḥ somavalko mahākumbhī bhadrā bhadravatī śivā kaṭphalaṃ tuvaraṃ tiktaṃ kaṭu vātakaphajvarān hanti śvāsapramehārśaḥkāsakaṇṭhāmayārucīḥ bhārṅgī bhṛgubhavā padmā kāsaghnī bhārgavāgraṇīḥ kharaśākaṃ śukramātā phañjī brāhmaṇayaṣṭikā bhārṅgī rūkṣā kaṭustiktā rucyoṣṇā pācanī jayet śophaśvāsasamīrāsrapīnasajvaramārutān pāṣāṇabhedaḥ pāṣāṇo 'śmarībhedo 'śmabhedakaḥ śilābhedo dṛṣadbhedo nagabhinnagabhedanaḥ pāṣāṇabhedastuvaraḥ śītalo vastiśodhanaḥ sarastiktaḥ pramehārśaḥkṛcchrāśmarirujo jayet mustaṃ vāridharo mustā meghākhyaḥ kuruvindakaḥ varāho 'bdo ghano bhadramusto rājakaserukaḥ piṇḍamustaṃ viṣadhvaṃsī nāgaro 'nyaḥ prakīrtitaḥ mustaṃ kaṭu himaṃ grāhi tiktaṃ dīpanapācanam kaṣāyaṃ kṛmipittāsrakaphatṛṣṇājvarāpaham dhātakī kuñjarā sindhupuṣpī pramadinī madā pārvatīyā tāmrapuṣpī subhikṣā madyavāsinī dhātakī kaṭukā śītā madakṛt tuvarā laghuḥ tṛṣṇātīsārapittāsraviṣakṛmivisarpajit mācikā bālikāmbaṣṭhā śacī dantaśaṭhāmbikā āmbaṣṭhakī sūcimukhī kaṣāyā sā kaṭaṃmukhī mācikāmlā rase pāke kaṣāyā śītalā laghuḥ pakvātīsārapittāsrakaphakaṇṭhāmayāpahā vidārikā vṛṣyavallī vṛṣyakandā vidālikā śṛṅgālikā kandavallī svādukandā palāśikā anyā śuklā kṣīraśuklā kṣīravallī payasvinī ikṣuvallī mahāśvetā kṣīragandhekṣugandhikā vidārī madhurā snigdhā bṛṃhaṇī stanyaśukradā guruḥ pittāsrapavanadāhān hanti rasāyinī vārāhī mādhavī ghṛṣṭiḥ saukarī vanamālikā tasyāḥ kandaḥ kiṭiḥ kroḍanāmā śambarakandakaḥ vārāhī madhurā kande kaṭus tiktātiśukralā balyā pittakarī vātakaphapittakṛmīn jayet pāṭhāmbaṣṭhā bṛhattiktā prācīnāmbaṣṭhakī rasā varā tiktā pāpacelī śreyasī viddhakarṇikā pāṭhoṣṇā kaṭukā tīkṣṇā vātaśleṣmaharā laghuḥ hanti śūlajvaracchardikuṣṭhātīsārahṛdrujaḥ dāhakaṇḍūviṣaśvāsakṛmigulmodaravraṇān mūrvā devī madhurasā devaśreṇī madhusravā snigdhaparṇī pṛthakparṇī moraṭā pīluparṇikā mūrvā sarā guruḥ svādustiktā pittāsramehanut tridoṣatṛṣṇāhṛdrogakaṇḍūkuṣṭhajvarāpahā mañjiṣṭhā vijayā raktā raktāṅgī kālameṣikā raktayaṣṭī tāmravallī samaṅgā vastrabhūṣaṇā mañjulā vikasā bhaṇḍī chadmikā jvaranāśinī mañjiṣṭhā madhurā tiktā kaṣāyā svaravarṇakṛt gururuṣṇā viṣaśleṣmaśophayonyakṣiśūlajit raktātīsārakuṣṭhāsravisarpavraṇamehanut tacchākaṃ dīpanaṃ svādu snigdham pittānilāpaham haridrā rajanī gaurī rañjinī varavarṇinī piṇḍī pītā varṇavatī niśā haṭṭavilāsinī haridrā kaṭukā tiktā rūkṣoṣṇā śleṣmapittanut varṇyā tvagdoṣamehāsraśophapāṇḍuvraṇāpahā dārvī dāruharidrānyā pītadāruḥ pacampacā kaṭaṅkaṭerī pītadruḥ svarṇavarṇā kaṭaṃkaṭī dārvī tadvadviśeṣāttu netrakarṇāsyarogajit prapunnāṭastveḍagajaścakramardaḥ prapunnaṭaḥ dadrughno mardako meṣakusumaḥ kuṣṭhakṛntanaḥ prapunnāṭo laghuḥ svādū rūkṣaḥ pittānilāpahaḥ hṛdyo himaḥ kaphaśvāsakuṣṭhadadrukṛmīn jayet hantyuṣṇaṃ tatphalaṃ kuṣṭhadadrukaṇḍūviṣānilān vātaraktāpahaṃ tasya śākaṃ kaphaharaṃ laghu bākucī candrikā somavallī pūtiphalā varā somarājī kṛṣṇaphalāvalgujā kālameṣikā vākucī madhurā tiktā kaṭupākā rasāyanī viṣṭambhinī himā rucyā sarā hṛdyāsrapittanut rūkṣā hanti kaphaśvāsakuṣṭhamehajvarakṛmīn tatphalam pittakṛt śvetakuṣṭhavātakaphāpaham bhṛṅgarājo bhekarājo mārkavaḥ keśarañjanaḥ aṅgārako bhṛṅgarajo bhṛṅgāhvaḥ sūryavallabhaḥ bhṛṅgarājaḥ kaṭustikto rūkṣoṣṇaḥ kaphavātajit dantyo rasāyano rucyaḥ kuṣṭhanetraśiro'rtinut parpaṭaḥ kavaco reṇuḥ pittahā yavakaṇṭakaḥ varastiktaḥ parpaṭakaḥ pṛthvikaścarmakaṇṭakaḥ parpaṭo hanti pittāsrabhramatṛṣṇākaphajvarān saṃgrāhī śītalastikto dāhanudvātalo laghuḥ śaṇapuṣpī mālyapuṣpī dhāvanī śaṇaghaṇṭikā bṛhatpuṣpī svalpaghaṇṭā ghaṇṭāśabdorupuṣpikā śaṇapuṣpī kaṭuḥ pittaśleṣmajicchardikāriṇī trāyamāṇā suratrāṇā trāyantī girisānujā balabhadrā kṛtatrāṇā vārṣikaṃ trāyamāṇakaḥ trāyamāṇā sarā pittajvaraśleṣmāsraśūlajit mahājālinikā carmaraṅgā syāt pītakīlikā āvartakī bindukinī vibhāṇḍī raktapuṣpikā mahājālinikā tiktā recanī kaphapittajit hanti dāhodarānāhaśophakuṣṭhakṛmijvarān ativiṣā śuklakandā viṣā prativiṣā parā śyāmakandāsitā śṛṅgī bhaṅguropaviṣāṇikā viṣoṣṇā pācanī tiktā śleṣmavātātisārajit kākamācī dhvāṅkṣamācī kāmācī jaghanephalā rasāyanī varā sarvatiktā syātkākinī kaṭuḥ kākamācī tridoṣaghnī snigdhoṣṇā svaraśukradā hṛdyā rasāyanī śophakuṣṭhārśojvaramehajit kākajaṅghā nadīkāntā kākatiktā salomaśā pārāvatapadī kākā madadhyā karmaṇī tathā kākajaṅghā himā hanti raktapittakaphajvarān lodhrastirīṭaḥ kānīnastilvakaḥ saṃtatodbhavaḥ anyo ghanatvak śabaraḥ śvetalodhro 'kṣibheṣajam lodhro virecakaḥ śītaścakṣuṣyaḥ kaphapittanut kaṣāyo raktaśophāsrajvarātīsāranāśanaḥ tatpuṣpaṃ madhuraṃ grāhi satiktaṃ śleṣmapittajit vṛddhadārur mahāśyāmo jāṅgalo vṛddhadārukaḥ antaḥkoṭarapuṣpī syādāvegī chagalāntrikā vṛddhadāruḥ kaṣāyoṣṇaḥ sarastikto rasāyanam vṛṣyo vātāmavātāsraśophamehakaphān jayet devadālī vṛttakośā devatāḍo garāgarī jīmūtas tāḍakā veṇī jālinyākhuviṣāpahā devadālī rase tiktā kaphārśaḥśophapāṇḍutāḥ nāśayed vāmanī tīkṣṇā kṣayahikkākṛmijvarān haṃsapādī haṃsapadī raktapādī nṛpādikā prahlādanī kīṭamārī kīṭamātā madhusravā haṃsapādī guruḥ śītā hanti raktaviṣavraṇān visarpadāhātīsāralūtābhūtāṃśca ropaṇī nākulī suvahā sarpagandhinī gandhanākulī nakuleṣṭā matā sarpanetrā cīritapattrikā nākulī tuvarā tiktā kaṭukoṣṇā vināśayet viṣaṃ lūtāvṛścikākhusarpāṇāṃ ca kṛmīnvraṇān vaṭapattrī dīpanī syānmohanī recanī matā vaṭapattrī yonigadānkaṣāyoṣṇā vināśayet tatphalaṃ stambhanaṃ śītaṃ vātalaṃ kaphapittajit lajjālur medinī spṛkkā khādirī gandhakāriṇī namakārī śamīpattrā samaṅgā raktapādikā lajjāluḥ śītalā tiktā kaṣāyā śleṣmapittajit raktapittamatīsāraṃ yonirogaṃ vināśayet somavallī yajñanetā somakṣīrī dvijapriyā somavallī tridoṣaghnī kaṭustiktā rasāyanī musalī khalinī tālapatrī kāñcanapuṣpikā mahāvṛṣyā vṛṣyakandā kharjūrī tālamūlikā musalī madhurā vṛṣyā vīryoṣṇā bṛṃhaṇī guruḥ tiktā rasāyanī hanti gudajānanilaṃ tathā kapikacchuḥ svayaṅguptā kaṇḍūrā durabhigrahā caṇḍātmaguptā lāṅgūlī markaṭī syāttu harṣiṇī kapikacchuḥ paraṃ vṛṣyā madhurā bṛṃhaṇī guruḥ tadbījaṃ vātaśamanaṃ vājīkaraṇamuttamam putrajīvo garbhakaro yaṣṭipuṣpo 'rthasādhanaḥ putrajīvo gurur vṛṣyo garbhadaḥ śleṣmavātakṛt vandhyākarkoṭikā devī kumārī viṣanāśinī manojñā nāgadamanī vandhyā yogeśvarī smṛtā vandhyākarkoṭikā laghvī kaphanud vraṇaśodhinī sarpadarpaharā tīkṣṇā visarpaviṣavāriṇī viṣṇukrāntā nīlapuṣpī jayā vaśyāparājitā viṣṇukrāntā kaṭurmedhyā kṛmivraṇakaphān jayet śaṅkhapuṣpī śaṅkhanāmnī kirīṭī kambumālinī kambupuṣpī smṛtihitā medhyā vanavilāsinī śaṅkhapuṣpī sarā medhyā matā ceto'vikāriṇī rasāyanī kaṣāyoṣṇāsmṛtimehavināśinī dugdhikā madhuparṇī syātkṣīriṇī svādupuṣpikā kṣudraparṇī payasyā ca pramehaghnī madhucchadā nāgārjunī nāgasahā kumāratilakā parā dugdhikoṣṇā gurū rūkṣā vātalā garbhakāriṇī svādurviṣṭambhinī vṛṣyā kaphakuṣṭhakṛmīñjayet arkapuṣpī krūrakarmā jalakāmā bhiriṇḍikā arkapuṣpī kṛmiśleṣmamehacittavikārahṛt bhallātako 'nalo bhallī vīravṛkṣo 'gnivaktrakaḥ aruṣkarastathāruṣkas tapano 'gnimukhī dhanuḥ bhallātakaḥ kaṣāyoṣṇaḥ śukralo madhuro laghuḥ vātaśleṣmodarānāhakuṣṭhārśograhaṇīgadān hanti gulmajvaraśvitravahnimāndyakṛmivraṇān cirapoṭā dīrghapatrā kuntalas tiktakā matā cirapoṭā himā rūkṣā bhedanī śvāsakāsajit droṇapuṣpī śvasanakā pālindī kumbhayonikā chattrātichattrikā droṇā kauṇḍinyo vṛkṣasārakaḥ droṇapuṣpī gurū rūkṣā svādūṣṇā vātapittanut bhedanī kāmalāśophakaphakṛmiharā laghuḥ brāhmī sarasvatī somā satyāhvā brahmacāriṇī maṇḍūkaparṇī māṇḍūkī tvāṣṭrī divyā mahauṣadhī kapotavaṅkā munikā lāvaṇyā somavallarī brāhmī sarā himā svādurlaghur medhyā rasāyanī svaryā smṛtipradā kuṣṭhapāṇḍumehāsrakāsajit viṣaśophajvaraharā tadvanmaṇḍūkaparṇinī suvarcalārkakāntā syātsūryabhaktā sukhodbhavā sūryāvartā raviprītā tvanyā brahmasuvarcalā suvarcalā guruḥ śītā mūtralā kaphavātajit anyoṣṇā kuṣṭhamehāśmakṛcchrajvaraharā laghuḥ matsyākṣī bāhlikā matsyagandhir matsyādanī tathā matsyākṣī grāhiṇī tiktā kuṣṭhapittakaphāsranut jalapippalyambuvallī pattūraḥ kañcaṭaṃ tathā jalapippalikā hṛdyā cakṣuṣyā śukralā laghuḥ saṅgrāhiṇī himā rūkṣā raktadāhavraṇāpahā gojihvā gojikā gobhī dīrghikā kharaparṇinī gojihvā vātalā śītā grāhiṇī kaphapittanut hṛdyā pramehakāsāsravraṇajvaraharā laghuḥ nāgāhvā damanī nāgagandhā bhujagaparṇinī syānnāgadamanī vraṇyā lūtāsarpaviṣāpahā guñjā śikhaṇḍikā tāmrā raktikā kākaṇantikā śvetānyā cakrikā cūḍā durmukhī kākapīlukā guñjā keśyā balakarī tvacyā pittakaphāpahā netrāmayaharā hanti kaṇḍūgrahavraṇān kṛmīndraluptakuṣṭhāni tadvacchvetātiśasyate vellantaro dīrghapatro vīradrur bahupattrakaḥ vellantaro 'nudgrāhī kaphakṛcchrānilārtijit vandākaḥ syādvṛkṣaruhā śekharī kāmavṛkṣakaḥ vṛkṣādanī kāmataruḥ kāminī pādarohiṇī vandākaḥ kaphavātāsravakṣovraṇaviṣāpahaḥ piṇḍāraḥ karahāṭaḥ syāt tīkṣṇakīlaḥ kuraṅgakaḥ piṇḍāro madhuraḥ śītaḥ śothapittakaphāpahaḥ chikkikā kṣavakaḥ krūro nāsāsaṃvedanaḥ kaṭuḥ chikkikā pittalā kuṣṭhakṛmivātakaphāpahā rohito dāḍimīpuṣpo rohītaḥ kūṭaśālmaliḥ plīhā rohiṇī rohī raktaghnaḥ pārijātakaḥ rohītakaḥ sagulmayakṛtplīhodarāpahaḥ mocakaḥ syānmocarasaḥ śālmalīveṣṭakaḥ smṛtaḥ mocaniryāsakaḥ piccho mocasrāvī ca veṣṭakaḥ mocakaḥ śītalo grāhī gururvṛṣyo'tisārajit pravāhikāmavātāsrakaphadāhanibarhaṇaḥ ajagandhā bastagandhā kavarī pūtibarbarī ajagandhā laghū rucyā hṛdyāsrakaphavātanut saireyakaḥ sahacaraḥ saireyaḥ kiṅkirātakaḥ dāsīsahacaro jhiṇṭī sairyako mṛdukaṇṭakaḥ raktapuṣpaḥ kuravakaḥ pīto jñeyaḥ kuraṇṭakaḥ nīlaścārtagalaḥ prokto bāṇaodanapākyapi saireyaḥ kuṣṭhavātāsrakaphakaṇḍūviṣāpahaḥ tiktoṣṇo madhuraḥ keśyaḥ susnigdhaḥ keśarañjanaḥ śvetaspandā śvetapuṣpā kaṭabhī girikarṇikā sitāparājitā śvetā viṣaghnī mehanāśinī nīlaspandā vyaktagandhā nīlapuṣpā gavādinī śvetaspandādvayaṃ śītaṃ grahaghnaṃ dṛṣṭikaṇḍuhṛt kuṣṭhaśūlatridoṣāmaśophavraṇaviṣāpaham ikṣuraḥ kṣurako 'vyaṇḍaḥ kokilākṣaḥ kṣuraḥ smṛtaḥ tailakaṇṭas tikṣur ikṣuvālikā cekṣugandhikā kṣurakaḥ vṛṣyo gururvātakaphāsrajit kārpāsaḥ paṭalastūlaśchādano bādaraḥ picuḥ kārpāsako laghuḥ koṣṇo madhuro vātanāśanaḥ tadbījaṃ vṛṣyaṃ snigdhaṃ kaphakaraṃ guru ārāmaśītalā devagandhā kukkuramardanaḥ ārāmaśītalā śītā kaṭuḥ pittakaphāsrajit kukkuradrustāmracūḍaḥ sūkṣmapattro mṛducchadaḥ kukkuraḥ kaṭustikto jvararaktakaphāpahaḥ vāmī śaṅkhadharā dhārī brāhmī ca hilamocikā śothaharā kuṣṭhapittaśleṣmaharā sarā balāmoṭā japā sūkṣmapattrā jñeyāparājitā balā viṣaśleṣmakṛminudvijayapradā śarapuṅkhā kālaśākaṃ plīhāriḥ kālikā matā puṅkhā yakṛtplīhaduṣṭavraṇaviṣāpahā tiktā kaṣāyā kāsaśvāsajvaraharā laghuḥ mayūrāhvā śikhā jñeyā sāhasrī madhukachadā mayūraśikhā laghvī pittaśleṣmātisārajit lakṣmaṇā putradā raktabindupattrā ca nāginī gokṣīrasadṛśaṃ puṣpaṃ romavallisamanvitam raktabinduyutaṃ patraṃ lakṣmaṇākāra ucyate lakṣmaṇā garbhadā śītā sarā vṛṣyā doṣanut māṃsarohiṇyatiruhā vṛntā carmakaṣā kasā syānmāṃsarohiṇī vṛṣyā sarā doṣatrayāpahā asthisaṃhārako vajravallarī kroṣṭughaṇṭikā vajrāṅgī granthimānvajrī proktā syādasthiśṛṅkhalā asthisaṃhārakaḥ śīto vṛṣyo vātaharo 'sthiyuk arkaḥ sūryāhvayaḥ kṣīrī sadāpuṣpo vikīraṇaḥ mandāro vasuko'larko rājārko dīrghapuṣpakaḥ arkadvayaṃ saraṃ vātakuṣṭhakaṇḍūgrahavraṇān nihanti plīhagulmārśoyakṛcchūlodarakṛmīn karavīro 'śvahā śvetapuṣpaḥ syācchvetakumbhakaḥ yāvānī yāvanī tīvrā turuṣkā madakāriṇī yavānī pācanī rūkṣā grāhiṇī mādinī guruḥ tilabhedaḥ khasatilaḥ śubhrapuṣpo lasatphalaḥ vṛṣyo balyaḥ khasatilaḥ śleṣmalo vātajit guruḥ valkalastatphalodbhūto rūkṣo grāhī viśoṣaṇaḥ aphūkaṃ tadrasodbhūtamahiphenamaphenakam aphūkaṃ śoṣaṇaṃ grāhi śleṣmaghnaṃ vātapittalam chilihiṇṭo mahāmūlaḥ pātālagaruḍāhvayaḥ chilihiṇṭaḥ paraṃ vṛṣyaḥ śleṣmalaḥ pavanāpahaḥ yo rājñāṃ mukhatilakaḥ kaṭāramalastena śrīmadananṛpeṇa nirmite'tra granthe'bhūnmadanavinodanāmni pūrṇo vargo'yaṃ lalitapadāṅkito 'bhayādiḥ tatra virājitamadhyasadabjaṃ śrīruciram paramakṣaram ekam śrīmadanakṣitipāla sadā te viṣṇupadaṃ vipadaṃ vinihantu śuṇṭhī viśvauṣadhaṃ viśvaṃ kaṭu bhadraṃ kaṭūtkaṭam mahauṣadhaṃ śṛṅgaveraṃ nāgaraṃ viśvabheṣajam śuṇṭhī rucyāmavātaghnī pācanī kaṭukā laghuḥ snigdhoṣṇā madhurā pāke kaphavātavibandhanut vṛṣyā svaryā vamiśvāsakāsaśūlahṛdāmayān hanti ślīpadaśophārśaānāhodaramārutān ārdrakaṃ śṛṅgaveraṃ tat kandauṣadhamudāhṛtam ārdrakaṃ nāgaraguṇaṃ bhedanaṃ dīpanaṃ guru maricaṃ vallijaṃ tīkṣṇaṃ malinaṃ śyāmamūṣaṇam maricaṃ kaṭukaṃ tīkṣṇaṃ dīpanaṃ kaphavātanut uṣṇam pittakaraṃ rūkṣaṃ śvāsakāsakṛmīñjayet tadārdraṃ madhuram pāke nātyuṣṇaṃ kaṭukaṃ guru kiṃcittīkṣṇaguṇaṃ śleṣmapraseki syādapittalam pippalī capalā kṛṣṇā māgadhī magadhā kaṇā viśvopakulyā vaidehī śauṇḍī syāt tīkṣṇataṇḍulā pippalī dīpanī vṛṣyā svādupākā rasāyanī atyuṣṇā kaṭukā snigdhā kaphavātaharā laghuḥ pittalā recanī hanti śvāsakāsodarajvarān kuṣṭhapramehagulmārśaḥplīhaśūlāmamārutān ārdrā kaphapradā snigdhā śītalā madhurā guruḥ viśvopakulyāmaricaistryūṣaṇaṃ kaṭukaṃ kaṭu vyoṣaṃ kaṭutrayaṃ tatsyāt sagranthi caturūṣaṇam tryūṣaṇaṃ dīpanaṃ hanti śvāsakāsatvagāmayān gulmamehakaphasthaulyamedaḥślīpadapīnasān kaṇāmūlaṃ kaṭugranthi pippalīmūlamūṣaṇam ṣaḍgranthi granthikaṃ mūlaṃ magadhaṃ caṭikāśiraḥ dīpanam pippalīmūlaṃ kaṭūṣṇaṃ pācanaṃ laghu rūkṣaṃ pittakaram bhedi kaphavātodarāpaham cavyaṃ cavanamuddiṣṭaṃ cavikā kolavallikā pippalīmūlavattatsyādviśeṣād gudajāpaham tatphalaṃ śreyasī hastimagadhī gajapippalī gajakṛṣṇā kaṭur vātaśleṣmanud vahnivardhinī uṣṇā nihantyatīsāraśvāsakaṇṭhāmayakṛmīn citrako hutabhugvyālo dāruṇo dahano 'ruṇaḥ dvīpī pālī haviḥ pāṭhī vahnināmā viśeṣataḥ citrakaḥ kaṭukaḥ pāke vahnivatpācano laghuḥ rūkṣoṣṇo grahaṇīkuṣṭhaśophārśaḥkṛmikāsajit śleṣmānilaharo grāhī tacchākaṃ śleṣmapittajit pippalīmagadhāmūlacavyacitrakanāgaraiḥ pañcakolaṃ kaphānāhagulmaśūlārucīr jayet maricena yutaṃ tattu ṣaḍūṣaṇamudīritam śatapuṣpā śiphā śeṣā śatāhvā kāravī miśiḥ avākpuṣpītvaticchatrā śvetikā māgadhī parā śatapuṣpā laghustīkṣṇā pittakṛddīpanī kaṭuḥ uṣṇā jvarānilaśleṣmavraṇaśūlākṣiroganut śvetikā tadguṇā proktā viśeṣād yoniśūlajit miśreyā miśiśālinyau śālī śītaśivā matā miśreyā dīpanī hṛdyā baddhaviṭkṛmikuṣṭhanut rūkṣoṣṇā tatphalaṃ kāsavamiśleṣmānilāñjayet methikā vastikā śelur ahilyā vanamethikā ahilyālpaguṇā tasmād vājināṃ sā tu pūjitā ajamodātyugragranthā modā hastimayūrakaḥ kharāhvā kāravī vallī bastamodā ca markaṭaḥ ajamodā kaṭustīkṣṇā dīpanī kaphavātanut uṣṇā vidāhinī hṛdyā vṛṣyā baddhamalā laghuḥ netrāmayakrimichardisidhmabastirujo jayet jīrakaṃ dīrghakaṃ śuklam ajājī kaṇajīrakam jīrakaṃ jaraṇaṃ kṛṣṇaṃ varṣākālasugandhikam kalikā bāṣpikā kuñciḥ kāravī copakuñcikā pṛthvīkā suṣavī pṛthvī sthūlājājyupakālikā jīrakatritayaṃ rūkṣaṃ kaṭūṣṇaṃ dīpanaṃ laghu saṃgrāhi pittalaṃ medhyaṃ garbhāśayaviśuddhikṛt cakṣuṣyaṃ pavanādhmānagulmacchardibalāsajit yavānī dīpyako dīpyo dīpanīyā yavānikā yavasāhogragandhā syādyavāhvā bhūkadambakaḥ yavānī pācanī rucyā tīkṣṇoṣṇā kaṭukā laghuḥ vātaśleṣmodarānāhaśūlakrimīñjayet yavānīyā yavānī syāccauhāro jantunāśanaḥ cauhārastadguṇaḥ prokto viśeṣāt kṛmināśanaḥ ajagandhā pūtikīṭā barbarī pūtibarbaraḥ kāravī kharapuṣpā ca tuṅgī pūtimayūrakaḥ ajagandhā kaṭustīkṣṇā rūkṣā hṛdyāgnivardhinī dṛṣṭimāndyapradā laghvī śukravātakaphāpahā vacogragandhā golomī ṣaḍgranthā jaṭilā matā jaṭilā śataparvānyā lomaśā hemavatyapi vacoṣṇā kaṭukā tiktā vāmanī svaravahnikṛt apasmārakaphonmādabhūtaśūlānilāñjayet hapuṣā vapuṣā viśvā vigandhā viśvagandhikā hapuṣā dīpanī tiktā kaṭūṣṇā tuvarā guruḥ pittodarasamīrārśograhaṇīśophagulmajit viḍaṅgaṃ jantuhananaṃ kṛmighnaṃ kṣudrataṇḍulā bhūtaghnī taṇḍulā ghoṣā karālā mṛgagāminī viḍaṅgaṃ kaṭu tiktoṣṇaṃ rūkṣaṃ vahnikaraṃ laghu gulmādhmānodaraśleṣmakṛmivātavibandhanut dhānyākaṃ dhānyakaṃ dhānyaṃ dhāneyaṃ ca vitunnakam kustumburu tadārdraṃ tu dhānīdhāneyakālukāḥ dhānyakaṃ tuvaraṃ snigdhamavṛṣyaṃ mūtralaṃ laghu hṛdyaṃ rūkṣaṃ baddhaviṭkaṃ svādu pāke tridoṣanut pācanaṃ śvāsakāsāsratṛṣṇāmārśaḥkṛmīñjayet āhnīkā tadguṇā svādurviśeṣātpittanāśinī hiṅgupattrī pṛthustanvī pṛthvīkā cārupattrikā bāṣpikā kāravī tanvī bilvikā dīrghikā tathā hiṅgupattrī parā veṇupattrī hiṅguśivāṭikā jantukā rāmaṭhī nāḍī piṇḍā hiṅguphalā matā hiṅgupattrīdvayaṃ hṛdyaṃ tīkṣṇoṣṇaṃ pācanaṃ kaṭu hṛdvastirugvibandhārśaḥśleṣmagulmānilāpaham hiṅgur bāhlīkam atyugraṃ rāmaṭham bhūtanāśanam agūḍhagandhaṃ jaraṇaṃ jantukaṃ śūlanāśanam hiṅgūṣṇam pācanaṃ rucyaṃ tīkṣṇoṣṇaṃ kaphavātajit śūlagulmodarānāhakṛmijit pittavarddhanam vaṃśajā vaiṇavī kṣīrī tvakkṣīrī vaṃśarocanā tugākṣīrī tugā vāṃśī vaṃśakṣīrī śubhā sitā bṛṃhaṇī vaṃśajā vṛṣyā śītalā madhurā jayet tṛṣṇājvarakṣayaśvāsakāsapittāsrakāmalāḥ saindhavaṃ sindhujaṃ śuddhaṃ māṇimantham paṭūttamam saindhavaṃ madhuraṃ hṛdyaṃ dīpanaṃ śītalaṃ laghu cakṣuṣyam pācanaṃ snigdhaṃ vṛṣyaṃ doṣatrayāpaham sauvarcalaṃ sugandhākṣaṃ rucakam pūtigandhakam sauvarcalaṃ vahnikaraṃ kaṭūṣṇaṃ viśadaṃ laghu udgāraśuddhidaṃ sūkṣmaṃ vibandhānāhaśūlajit viḍaṃ kṛtrimakam pākyaṃ dhūrtaṃ drāviḍam āsuram viḍaṃ laghūṣṇaṃ viṣṭambhaśūlahṛdgauravārucīḥ hantyānāhakaphau sūkṣmam adhovātānulomanam sāmudraṃ vārisaṃbhūtam akṣīvaṃ vaśiraṃ tathā sāmudraṃ dīpanaṃ svādu nātyuṣṇam bhedanaṃ kaṭu śleṣmalaṃ vātanuttiktam arūkṣaṃ nātipittalam audbhidaṃ bhūmijam bhaumam pārthivam pṛthivībhavam audbhidaṃ raktalaṃ sūkṣmaṃ laghu vātānulomanam gaḍākhyaṃ romalavaṇaṃ romaṃ śākambharībhavam gaḍākhyaṃ laghu vātaghnam atyuṣṇam bhedi mūtralam kṣāram pāṃsubhavaṃ tauṣamauṣaram pāṃsavaṃ vasu kṣāraṃ guru kaṭu snigdhaṃ śleṣmalaṃ vātanāśanam kācaṃ trikūṭam pākyāhvaṃ lavaṇaṃ kācasambhavam kācaṃ dīpanam atyuṣṇaṃ raktapittavivarddhanam yavakṣāraḥ śūkapākyo yāvaśūko yavāgrajaḥ svarjikā svarjikāpākyaḥ sukhavarcaḥ suvarci yavakṣāro 'gnikṛd vātaśleṣmaśvāsagalāmayān āmārśograhaṇīgulmayakṛtplīharujo jayet svarjikālpaguṇā tasmād viśeṣād gulmaśūlajit ṭaṅkaṇo mālatījāto drāvī lohaviśuddhikṛt ṭaṅkaṇo'gnikaro rūkṣaḥ kaphaghno vātapittakṛt sudhāmṛtāhvayaḥ saudhabhūṣaṇaṃ kaṭhaśarkarā sudhākṣāro 'gnisaṅkāśaḥ pākī kledī vidāraṇaḥ palāśatilanālaśvadaṃṣṭrajaḥ kadalībhavaḥ apāmārgārkasehuṇḍamuṣkakādisamudbhavāḥ kṣārā vahnisamāḥ sarve pācanā bhedidāraṇāḥ laghavaśchedinastīkṣṇāḥ śukraujodṛṣṭināśanāḥ raktapittakarā ghnanti vibandhānāhapīnasān yakṛtplīhabalāsāmagulmārśograhaṇīkṛmīn yo rājñām pūrṇaḥ śuṇṭhyādiḥ khalu bhiṣajāṃ hitāya vargaḥ iti śrīmadanapālaviracite nighaṇṭau śuṇṭhyādivargo dvitīyaḥ yadvāñchayā viśvakṛto'pi devā brahmādayo yānti muhurbhavanti acintyakṛtyaṃ puruṣaṃ purāṇaṃ gopatvam āptaṃ tamupāśrayāmi suvarṇaṃ kāñcanaṃ hema hāṭakaṃ taptakāñcanam cāmīkaraṃ śātakumbhaṃ tapanīyaṃ ca rukmakam jāmbūnadaṃ hiraṇyaṃ ca svaralaṃ jātarūpakam suvarṇaṃ śītalaṃ vṛṣyaṃ balyaṃ guru rasāyanam kāntipradaṃ viṣonmādatridoṣajvaraśoṣajit kaṣāyaṃ tiktamadhuraṃ suvarṇaṃ guru lekhanam rūpyakaṃ rajataṃ rūpyaṃ tāraṃ śvetaṃ vasūttamam rūpyaṃ śītaṃ saraṃ vātapittahāri rasāyanam lekhanaṃ ca kaṣāyāmlaṃ vipāke cāparaṃ saram vayasaḥ sthāpanaṃ snigdhaṃ dhātūnāṃ hitamucyate tāmraṃ mlecchamukhaṃ śulvaṃ naipālaṃ ravināmakam udumbaraṃ sūryapriyaṃ raktajaṃ raktadhātukam tāmraṃ saraṃ laghu svādu śītaṃ pittakaphāpaham ropaṇaṃ pāṇḍukuṣṭhārśaḥśvayathuśvāsakāsajit kāṃsyaṃ lohaṃ nijaṃ ghoṣaṃ pañcalohaṃ prakāśakam kāṃsyaṃ gurūṣṇaṃ cakṣuṣyaṃ kaphapittaharaṃ saram pītalohaṃ siṃhalakaṃ kapilaṃ saukumārakam vartalohaṃ trilohaṃ ca rājarītirmaheśvarī pītalohaṃ himaṃ rūkṣaṃ kaṭūṣṇaṃ kaphapittanut raṅkakaṃ tīrakaṃ vaṅgaṃ trapu syātkaraṭī ghanam raṅgaṃ laghu saraṃ rūkṣamuṣṇaṃ mehakaphakrimīn nihanti pāṃḍuṃ saśvāsaṃ dṛśyamīṣattu pittalam jasadaṃ raṅkasadṛśaṃ ditihetuśca tanmatam jasadaṃ tuvaraṃ tiktaṃ śītalaṃ kaphapittahṛt cakṣuṣyaṃ paramaṃ mehān pāṇḍuṃ śvāsaṃ ca nāśayet sīsaṃ dhātumalaṃ nāgamuragaṃ paripiṣṭakam javaneṣṭaṃ ca bhujagaṃ visṛṣṭaṃ kṛṣṇakaṃ viduḥ sīsaṃ raṅgaguṇaṃ jñeyaṃ viśeṣānmehanāśanam lohaṃ śastram ayaḥ kuṣṭhaṃ vyaṅgaṃ pārāvataṃ ghanam kṛṣṇāyastanmalaṃ kiṭṭaṃ maṇḍūro lohajaṃ rajaḥ lohaṃ saraṃ guru svādu kaṣāyaṃ kaphapittanut śītaṃ netrahitaṃ rūkṣaṃ balyaṃ vātalam uttamam śophakuṣṭhapramehārśogarapāṇḍukrimīñjayet tatkiṭṭaṃ tadguṇaṃ jñeyaṃ viśeṣātpāṇḍunāśanam pāradaścapalo hemanidhiḥ sūto rasottamaḥ trinetro roṣaṇaḥ svāmī harabījaṃ rasaḥ prabhuḥ rasendraśceti vikhyāto rasaloho mahārasaḥ pāradaḥ kṛmikuṣṭhaghnaścakṣuṣyoṣṇo rasāyanaḥ abhrakaṃ svacchamākāśaṃ paṭalaṃ varapītakam abhraṃ guru himaṃ balyaṃ kuṣṭhamehatridoṣanut gaganaṃ kṛmikuṣṭhamehahṛd viśadaṃ śukrakaraṃ ca dīpanam kathitaṃ munibhiśca pūrvajair balyakṛcchukrakaraṃ ca sevitam gandhakaḥ saugandhako lekhī gandhāśmā gandhapītakaḥ lelītako balivasā vegandho gandhako baliḥ gandhakaḥ kaṭukaḥ pāke vīryoṣṇaḥ pittalaḥ saraḥ hanti kuṣṭhakṣayaplīhakaphavātarasāmayān mākṣikaṃ dhātumākṣīkaṃ tāpyaṃ tāpījamucyate mākṣikaṃ tuvaraṃ vṛṣyaṃ svaryaṃ laghu rasāyanam cakṣuṣyaṃ kuṣṭhaśophārśomehabastyartipāṇḍutāḥ vyavāyi kaṭukaṃ hanti kuṣṭhodaraviṣakṣayān manaḥśilā śilā golā naipālī kunaṭī kulā divyauṣadhirnāgamātā manoguptā mano'mbikā manaḥśilā kṛcchraharā saroṣṇā lekhanī kaṭuḥ tiktā snigdhā viṣaśvāsakāsabhūtakaphāsrajit haritālamalaṃ tālaṃ godantaṃ naṭabhūṣaṇam haritālaṃ kaṭu snigdhaṃ kaṣāyoṣṇaṃ viṣaṃ jayet kaṇḍūkuṣṭhāsyarogāṃśca kaphapittakacagrahān gairikaṃ raktapāṣāṇaṃ girimṛcca gavedhukam svarṇavarṇaṃ paraṃ svarṇamaṇḍalaṃ svarṇagairikam gairikaṃ dāhapittāsrakaphahikkāviṣāpaham cakṣuṣyamanyattadvacca viśeṣādvāntināśanam tutthaṃ karpūrikātuttham amṛtāsaṅgam ucyate mayūragrīvakaṃ cānyacchikhikaṇṭhaṃ ca tutthakam tutthakaṃ lekhanaṃ bhedi kaṇḍūkuṣṭhaviṣāpaham kaphakrimiharaṃ tadvadanyaccakṣuṣyamuttamam kāsīsaṃ dhātukāsīsaṃ khecaraṃ taptalomaśam aparaṃ puṣpakāsīsaṃ tuvaraṃ vastrarāgadhṛk kāsīsadvayamamloṣṇaṃ tiktaṃ keśyaṃ dṛśe hitam hanti kaṇḍūtiviṣaśvitramūtrakṛcchrakaphānilān hiṃgulaṃ daradaṃ mlecchaṃ saikataṃ cūrṇapāradam hiṃgulaṃ pittakaphanuccakṣuṣyaṃ viṣakuṣṭhahṛt sindūraṃ nāgajaṃ raktaṃ śrīmacchṛṅgārabhūṣaṇam vasantamaṇḍanaṃ nāgaraktaṃ raktarajastathā sindūramuṣṇaṃ vīsarpakuṣṭhakaṇḍūviṣāpaham bhagnasandhānajananaṃ vraṇaśodhanaropaṇam sauvīramañjanaṃ kṛṣṇaṃ kālanīlaṃ suvīrajam srotoñjanaṃ tu srotojaṃ nadījaṃ yāmunaṃ varam sauvīraṃ grāhi madhuraṃ cakṣuṣyaṃ kaphavātajit sidhmākṣayāsranucchītaṃ sroto'ñjanam apīdṛśam rasāñjanaṃ rasodbhūtaṃ tārkṣyaṃ śailaṃ ca tārkṣyajam rasāgryaṃ kṛtrimaṃ tārkṣyaṃ dārvyaṃ dārvīrasodbhavam rasāñjanaṃ kaṭu śleṣmamukhanetravikārajit uṣṇaṃ rasāyanaṃ tiktaṃ chedanaṃ vraṇadoṣajit puṣpāñjanaṃ puṣpaketuṃ rītijaṃ kusumāñjanam puṣpāñjanaṃ kṣāramuṣṇaṃ kācāmapaṭalāpaham śilājatūṣṇajaṃ śailaniryāso giriśāhvayam śilāhvaṃ girijaṃ śailaṃ śaileyaṃ girijatvapi śilājatūṣṇaṃ kaṭukaṃ yogavāhi rasāyanam chardipramehavātārśaḥkuṣṭhāsyodarapāṇḍutāḥ hanti śvāsakṣayonmādaraktaśophakaphakrimīn bolaṃ gandharasaṃ vīraṃ nirlohaṃ barbaraṃ calam sugandhi nālikā piṇḍaṃ rasagandhaṃ ca taddvidhā bolaṃ raktaharaṃ śītaṃ medhyaṃ dīpanapācanam jvarāpasmārakuṣṭhaghnaṃ garbhāśayaviśodhanam sphaṭikākhyā mṛtā bāṣpī kakṣī saurāṣṭrasambhavā āḍakī tuvarā tvanyā mṛttikā suramṛttikā sphaṭikākhyā kaṣāyoṣṇā kaphapittaviṣavraṇān nihanti śvitravīsarpāṃstuvarī tadguṇā matā samudrapheno ḍiṇḍīraḥ pheno vārikapho dvijaḥ samudraphenaścakṣuṣyo lekhanaḥ śamanaḥ saraḥ pravālaṃ vidrumaṃ sindhur latāgraṃ raktavarṇakam puṣṭidaṃ kāntidaṃ balyaṃ vardhanaṃ balaśukrayoḥ mauktikaṃ tautilā muktāphalaṃ muktā ca śuktijam mauktikaṃ madhuraṃ śītaṃ rogaghnaṃ viṣanāśanam māṇikyaṃ padmarāgaṃ syādvasu ratnaṃ suratnakam sūryakāntaḥ sūryamaṇiḥ sūryākṣo dahanopalaḥ candrakāntaścandramaṇiḥ sphaṭikaḥ sphaṭikopalaḥ gomedaṃ sundaraṃ pītaṃ ratnaṃ tṛṇacaraṃ tathā hīrakaṃ bhiduraṃ vajraṃ sūcīvaktraṃ varāhakam nīlaratnaṃ nīlamaṇirvaiḍūryaṃ bālavāyajam gārutmataṃ marakataṃ dṛṣadgarbho harinmaṇiḥ muktāsphoṭo'bdhimaṇḍūkī śuktir mauktikamandiram pravālamuktimāṇikyasūryaśītakaropalāḥ gomedavajravaiḍūryanīlagārutmatādayaḥ cakṣuṣyā lekhanāḥ śītāḥ kaṣāyā madhurāḥ sarāḥ māṅgalyā dhāraṇāddāhaduṣṭagrahaviṣāpahāḥ śaṅkhaḥ kamburjaladharo vārijo dīrghaniḥsvanaḥ śaṅkho hi kaṭukaḥ pāke kaṣāyo madhuro laghuḥ cakṣuṣyo lekhanaḥ paktiśūlapittavināśanaḥ śaṅkho netrahitaḥ śīto laghuḥ pittakaphāsrajit śaṅkho laghuḥ śaṅkhanakaḥ śambuko vāriśuktayaḥ kapardāḥ kṣullakā jñeyā varāṭāśca varāṭikā laghuśaṅkhādayaḥ śītā netraruksphoṭanāśanāḥ khaṭī makkollakhaṭinī śvetā nāḍītaraṅgakaḥ tadbhedo gauḍapāṣāṇaḥ kṣīrapāka udāhṛtaḥ khaṭī dāhāsranucchītā gauḍagrāvāpi tadguṇaḥ paṅkaḥ kardamako jñeyo vālukā sikatā tathā paṅko dāhāsrapittārttiśothaghnaḥ śītalaḥ saraḥ vālukā lekhanī śītā vraṇoraḥkṣatanāśinī cumbakaḥ kāntapāṣāṇo'yaskānto lohakarṣakaḥ cumbako lekhanaḥ śīto medoviṣagarāpahaḥ kācaḥ kṛtrimaratnaṃ syād piṅgāṇaḥ kācabhājanam kāco vidāraṇo vraṇyaścakṣuṣyo lekhano laghuḥ yo rājñāṃ mukhatilakaḥ kaṭāramallas tena śrīmadananṛpeṇa nirmite'tra granthe'bhūnmadanavinodanāmni pūrṇaścitro 'yaṃ lalitapadaiḥ suvarṇavargaḥ