Haṃsadūta

dukūlaṃ bibhrāṇo dalitaharitāladyutiharaṃ javāpuṣpaśreṇīrucirucirapādāmbujatalaḥ tamālaśyāmāṅgo darahasitalīlāñcitamukhaḥ parānandābhogaḥ sphuratu hṛdi me ko'pi puruṣaḥ yadā yāto gopīhṛdayamadano nandasadanān mukundo gāndhinyās tanayam anuvindan madhupurīm tadāmāṅkṣīc cintāsar…

1. AttributionThe Digital Corpus of Sanskrit (DCS), Oliver Hellwigtextual
2. SourceUpstream TEI document · san · Latnpublished primary

dukūlaṃ bibhrāṇo dalitaharitāladyutiharaṃ javāpuṣpaśreṇīrucirucirapādāmbujatalaḥ tamālaśyāmāṅgo darahasitalīlāñcitamukhaḥ parānandābhogaḥ sphuratu hṛdi me ko'pi puruṣaḥ yadā yāto gopīhṛdayamadano nandasadanān mukundo gāndhinyās tanayam anuvindan madhupurīm tadāmāṅkṣīc cintāsariti ghanaghūrṇāparicayair agādhāyāṃ vādhāmayapayasi rādhā virahiṇī kadācit khedāgniṃ vighaṭayitum antargatam asau sahālībhirlebhe taralitamanā yāmunataṭīm cirād asyāś cittaṃ paricitakuṭīrāvakalanād avasthāṃ tastāra sphuṭam atha suṣupteḥ priyasakhī tadā niṣpandāṅgī kalitanalinīpallavakulaiḥ parīṇāhāt premnām akuśalaśatāśaṅkihṛdayaiḥ dṛgambhogambhīrīkṛtamihiraputrīlaharibhir vilīnā dhūlīnām upari parivavre parijanaiḥ tatastāṃ nyastāṅgīmurasi lalitāyāḥ kamalinīpalāśaiḥ kālindīsalilaśiśirairvījitatanum parāvṛttaśvāsāṅkuracalitakaṇṭhīṃ kalayatāṃ sakhīsaṃdohānāṃ pramadabharaśālī dhvanirabhūt nidhāyāṅke paṅkeruhadalaviṭaṅkasya lalitā tato rādhāṃ nīrāharaṇasaraṇīnyastacaraṇā milantaṃ kālindīpulinabhuvi khelāñcitagatiṃ dadarśāgre kaṃcinmadhuravirutaṃ śvetagarutam tadālokastokocchvasitahṛdayā sādaramasau praṇāmaṃ śaṃsantī laghu laghu samāsādya savidham dhṛtotkaṇṭhā sadyo harisadasi saṃdeśaharaṇe varaṃ dūtaṃ mene tam atilalitaṃ hanta lalitā amarṣāt premerṣyāṃ sapadi dadhatī kaṃsamathane pravṛttā haṃsāya khamabhilaṣitaṃ śaṃsitumasau na tasyā doṣo'yaṃ yadiha vihagaṃ prārthitavatī na kasmin visrambhaṃ diśati haribhaktipraṇayitā pavitreṣu prāyo viracayasi toyeṣu vasatiṃ pramodaṃ nālīke vahasi viśadātmā svayamapi ato'haṃ duḥkhārtā śaraṇam abalā tvāṃ gatavatī na bhikṣā satpakṣe vrajati hi kadācid viphalatām ciraṃ vismṛtyāsmān virahadahanajvālavikalāḥ kalāvān sānandaṃ vasati mathurāyāṃ madhuripuḥ tadetaṃ saṃdeśaṃ svamanasi samādhāya nikhilaṃ bhavān kṣipraṃ tasya śravaṇapadavīṃ saṃgamayatu nirastapratyūhaṃ bhavatu bhavato vartmani śivaṃ samuttiṣṭha kṣipraṃ manasi mudamādhāya sadayam adhastāddhāvanto laghu laghu samuttānanayanair bhavantaṃ vīkṣantāṃ kutukataralā gopaśiśavaḥ kiśorottaṃso 'sau kaṭhinamatinā dānapatinā yayā ninye tūrṇaṃ paśupayuvatījīvitapatiḥ tayā gantavyā te nikhilajagadekaprathitayā padavyā bhavyānāṃ tilaka kila dāśārhanagarī galadbāṣpāsāraplutadhavalagaṇḍā mṛgadṛśo vidūyante yatra prabalamadanāveśavivaśāḥ tvayā vijñātavyā haricaraṇasaṅgapraṇayino dhruvaṃ sā cakrāṅgī ratisakha śatāṅgasya padavī piban jambuśyāmaṃ mihiraduhitur vāri madhuraṃ mṛṇālīr bhuñjāno himakarakalākomalarucaḥ kṣaṇaṃ hṛṣṭastiṣṭhan nibiḍaviṭape śākhini sakhe sukhena prasthānaṃ racayatu bhavān vṛṣṇinagare balād ākrandan tīrthapathikam akrūramilitaṃ vidūrād ābhīrītatir anuyayau yena ramaṇam tamādau panthānaṃ racaya caritārthā bhavatu te virājantī sarvopari paramahaṃsasthitiriyam akasmādasmākaṃ harirapaharannaṃśukacayaṃ yamārūḍho gūḍhapraṇayalaharīḥ kandalayitum tava śrāntasyāntaḥsthagitaravibimbaḥ kisalayaiḥ kadambaḥ kādamba tvaritam avalambaḥ sa bhavitā kirantī lāvaṇyaṃ diśi diśi śikhaṇḍastavakinī dadhānā sādhīyaḥ kanakavimaladyotivasanam tamālaśyāmāṅgī saralamuralīcumbitamukhī jagau citraṃ yatra prakaṭaparamānandalaharī tayā bhūyaḥkrīḍārabhasavikasadballavavadhūvapurvallībhraśyanmṛgamadakaṇaśyāmalikayā vidhātavyo hallīsakadalitamallīlatikayā samantādullāsastava manasi rāsasthalikayā tadante vāsantīviracitam anaṅgotsavakalācatuḥśālaṃ śaureḥ sphurati na dṛśau tatra vikireḥ tadālokodbhedapramadabharavismāritagatikriye jāne tāvattvayi bata hatā gopavanitā mama syādarthānāṃ kṣatiriha vilambād yad api te vilokethāḥ sarvaṃ tadapi harikelisthalamidam taveyaṃ na vyarthā bhavatu śucitā kaḥ sa hi sakhe guṇo yaś cāṇūradviṣi matiniveśāya na bhavet sakṛdvaṃśīnādaśravaṇamilitābhīravanitārahaḥkrīḍāsākṣī pratipadalatāsadmasubhagaḥ sa dhenūnāṃ bandhur madhumathanakhaṭṭāyitaśilaḥ kariṣyatyānandaṃ sapadi tava govardhanagiriḥ tamevādriṃ cakrāṅkitakarapariṣvaṅgarasikaṃ mahīcakre śaṅkemahi śikhariṇāṃ śekharatayā arātiṃ jñātīnāṃ nanu harihayaṃ yaḥ paribhavan yathārthaṃ svaṃ nāma vyadhita bhuvi govardhana iti tamālasyālokādgiriparisare santi capalāḥ pulindyo govindasmaraṇarabhasottaptavapuṣaḥ śanaistāpaṃ tāsāṃ kṣaṇamapanayan yāsyati bhavān avaśyaṃ kālindīsalilaśiśiraiḥ pakṣapavanaiḥ tadante śrīkāntasmarasamaraghāṭīpulakitā kadambānāṃ vāṭī rasikaparipāṭīṃ sphuṭayati tvamāsīnastasyāṃ na yadi parito nandasi tato babhūva vyarthā te ghanarasaniveśavyasanitā śaranmeghaśreṇīpratibhaṭam ariṣṭāsuraśiraś ciraṃ śuṣkaṃ vṛndāvanaparisare drakṣyati bhavān yadāroḍhuṃ dūrān milati kila kailāsaśikharibhramākrāntasvānto giriśasuhṛdaḥ kiṃkaragaṇaḥ ruvan yāhi svairaṃ caramadaśayā cumbitaruco nitambinyo vṛndāvanabhuvi sakhe santi bahavaḥ parāvartiṣyante tulitamurajinnūpuraravāt tava dhvānāttāsāṃ bahirapi gatāḥ kṣipramasavaḥ tvamāsīnaḥ śākhāntaramilitacaṇḍatviṣi sukhaṃ dadhīthā bhāṇḍīre kṣaṇamapi ghanaśyāmalarucau tato haṃsaṃ bibhrannikhilanabhasaś cikramiṣayā sa vardhiṣṇuṃ viṣṇuṃ kalitadaracakraṃ tulayitā tvam aṣṭābhir netrair vigaladamalapremasalilair muhuḥ siktastambhāṃ catura caturāsyastutibhuvam jihīthā vikhyātāṃ sphuṭamiha bhavadbāndhavarathaṃ praviṣṭaṃ maṃsyante vidhim aṭavidevyas tvayi gate udañcannetrāmbhaḥ prasaralaharīpicchilapathaskhalatpādanyāsapraṇihitavilambākuladhiyaḥ harau yasminmagne tvaritayamunākūlagamanaspṛhākṣiptā gopyo yayuranupadaṃ kāmapi daśām muhurlāsyakrīḍāpramadamiladāhopuruṣikāvikāśena bhraṣṭaiḥ phaṇimaṇikulair dhūmalarucau puras tasmin nīpadrumakusumakiñjalkasurabhau tvayā puṇye peyaṃ madhuramudakaṃ kāliyahrade tṛṇāvartārāter virahadavasaṃtāpitatanoḥ sadābhīrīvṛndapraṇayabahumānonnatividaḥ praṇetavyo navyastabakabharasaṃvardhitaśucas tvayā vṛndādevyāḥ paramavinayādvandanavidhiḥ iti krāntvā kekākṛtavirutim ekādaśavanīṃ ghanībhūtaṃ cūtair vraja madhuvanaṃ dvādaśamidam purī yasminn āste yadukulabhuvāṃ nirmalayaśobharāṇāṃ dhārābhir dhavalitadharitrīparisarā niketairākīrṇā giriśagiriḍimbhapratibhaṭair avaṣṭambhastambhāvalivilasitaiḥ puṣpitavanā niviṣṭā kālindītaṭabhuvi tavādhāsyati sakhe samantādānandaṃ madhurajalavṛndā madhupurī vṛṣaḥ śambhoryasyāṃ daśati navamekatra yavasaṃ viriñcer anyasmin gilati kalahaṃso bisalatām kvacit krauñcārāteḥ kavalayati kekī viṣadharaṃ vilīḍhe śallakyā balaripukarī pallavam itaḥ abodhiṣṭhāḥ kāyān na hi vicalitāṃ pracchadapaṭīṃ vimuktāmajñāsīḥ pathi pathi na muktāvalimapi ayi śrīgovindasmaraṇamadirāmattahṛdaye satīti khyātiṃ te hasati kulaṭānāṃ kulamidam asavyaṃ bibhrāṇā padam adhṛtalākṣārasam asau prayātāhaṃ mugdhe virama mama veśaiḥ kimadhunā amandād āśaṅke sakhi purapuraṃdhrīkalakalād alindāgre vṛndāvanakusumadhanvā vijayate ayaṃ līlāpāṅgasnapitapuravīthīparisaro navāśokottaṃsaścalati purataḥ kaṃsavijayī kim asmān etasmānmaṇibhavanapṛṣṭhād vinudatī tvamekā stabdhākṣi sthagayasi gavākṣāvalimapi muhuḥ śūnyāṃ dṛṣṭiṃ vahasi rahasi dhyāyasi sadā śṛṇoṣi pratyakṣaṃ na parijanavijñāpanaśatam ataḥ śaṅke paṅkeruhamukhi yayau śyāmalaruciḥ sa yūnām uttaṃsas tava nayanavīthīpathikatām vilajjaṃ mā rodīr iha sakhi punaryāsyati haris tavāpāṅgakrīḍānibiḍaparicaryāgrahilatām iti svairaṃ yasyāṃ pathi pathi murārer abhinavapraveśe nārīṇāṃ ratirabhasajalpā vavṛdhire sakhe sākṣād dāmodaravadanacandrāvakalanasphuratpremānandaprakaralaharīcumbitadhiyaḥ muhus tatrābhīrīsamudayaśironyastavipadas tavākṣṇor ānandaṃ vidadhati purā pauravanitāḥ atha krāmaṃ krāmaṃ kramaghaṭanayā saṃkaṭatarān nivāsān vṛṣṇīnām anusara purīmadhyaviśikhān murārāteryatra sthagitagaganābhir vijayate patākābhiḥ saṃtarpitabhuvanam antaḥpuravaram yadutsaṅge tuṅgasphaṭikaracitāḥ santi parito marālā māṇikyaprakaraghaṭitatroṭicaraṇāḥ suhṛdbuddhyā haṃsāḥ kalitamadhurasyāmbujabhuvaḥ samaryādā yeṣāṃ sapadi paricaryāṃ vidadhati cirān mṛgyantīnāṃ paśuparamaṇīnām api kulair alabdhaṃ kālindīpulinavipine līnam abhitaḥ sadālokollāsismitaparicitāsyaṃ sahacari sphurantaṃ vīkṣiṣye punarapi kim agre murabhidam viṣādaṃ mā kārṣīr drutam avitathavyāhṛtir asau samāgantā rādhe dhṛtanavaśikhaṇḍastava sakhā iti brūte yasyāṃ śukamithunam indrānujakṛte yad ābhīrīvṛndair upahṛtam abhūd uddhavakare ghanaśyāmā bhrāmyatyupari hariharmyasya śikhibhiḥ kṛtastotrā mugdhairagurujanitā dhūmalatikā tadālokād dhīra sphurati tava cenmānasarucir jitaṃ tarhi svairaṃ jalasahanivāsapriyatayā tato madhye kakṣaṃ pratinavagavākṣastabakinaṃ calanmuktālambasphuritam amalastambhanivaham bhavān draṣṭā hemollikhitadaśamaskandhacaritair lasadbhittiprāntaṃ muravijayinaḥ kelinilayam alinde yasyās te marakatamayī yaṣṭiramalā śayālur yāṃ rātrau madakalakalāpī kalayati nirātaṅkaṃ tasyāḥ śikharamadhiruhya śramanudaṃ pratīkṣethā bhrātar varam avasaraṃ yādavapateḥ niviṣṭaḥ paryaṅke mṛdulataratūlīdhavalite trilokīlakṣmīṇāṃ kakudi darasācīkṛtatanuḥ amandaṃ pūrṇendupratimamupadhānaṃ pramudito nidhāyāgre tasminn upahitakaphoṇidvayabharaḥ udañcatkālindīsalilasubhagaṃ bhāvukaruciḥ kapolānte preṅkhanmaṇimakaramudrāmadhurimā vasānaḥ kauśeyaṃ jitakanakalakṣmīparimalaṃ mukundaste sākṣāt pramadasudhayā sekṣyati dṛśau vikadruḥ paurāṇīr akhilakulavṛddho yadupater adūrād āsīno madhurabhaṇitīr gāsyati sadā purastād ābhīrīgaṇabhayadanāmā sa kaṭhino maṇistambhālambī kurukulakathāṃ saṃkalayitā śinīnām uttaṃsaḥ sa kila kṛtavarmāpyubhayataḥ praṇeṣyete vālavyajanayugalāndolanavidhim sa jānubhyāmaṣṭāpadabhuvamavaṣṭabhya bhavitā guroḥ śiṣyo nūnaṃ padakamalasaṃvāhanarataḥ vihaṃgendro yugmīkṛtakarasarojo bhuvi puraḥ kṛtāsaṅgo bhāvī prajavini nideśe 'rpitamanāḥ chadadvaṃdve yasya dhvanati mathurāvāsibaṭavo vyudasyante sāmasvarakalitam anyonyakalaham na nirvaktuṃ dāmodarapadakaniṣṭhāṅgulinakhadyutīnāṃ lāvaṇyaṃ bhavati caturāsyo 'pi caturaḥ tathāpi strīprajñāsulabhataralatvād aham asau pravṛttā tanmūrtistavaratimahāsāhasarase virājante yasya vrajaśiśukulasteyavikalasvayambhūcūḍāgrairlulitaśikharāḥ pādanakharāḥ kṣaṇaṃ yānālokya prakaṭaparamānandavirasaḥ sa devarṣir muktānapi tanubhṛtaḥ śocati bhṛśam sarojānāṃ vyūhaḥ śriyam abhilaṣan yasya padayor yayau rāgāḍhyānāṃ vidhuram udavāsavratavidhim himaṃ vande nīcair anucitavidhānavyasanināṃ yadeṣāṃ prāṇāntaṃ damanam anuvarṣaṃ praṇayati rucīnāmullāsair marakatamayasthūlakadalīkadambāhaṃkāraṃ kavalayati yasyoruyugalam yad ālānastambhadyutim avalalambe balavatāṃ madāduddāmānāṃ paśuparamaṇīcittakariṇām sakhe yasyābhīrīnayanaśapharījīvanavidhau nidānaṃ gāmbhīryaprasarakalitā nābhisarasī yataḥ kalpasyādau sanakajanakotpattivaḍabhīgabhīrāntaḥkakṣādhṛtabhuvanam ambhoruham abhūt dyutiṃ dhatte yasya trivalilatikāsaṃkaṭataraṃ sakhe dāmaśreṇīkṣaṇaparicayābhijñam udaram yaśodā yasyāntaḥ suranarabhujaṃgaiḥ parivṛtaṃ mukhadvārā vāradvayam avaluloke tribhuvanam uro yasya sphāraṃ sphurati vanamālāvalayitaṃ vitanvānaṃ tanvījanamanasi sadyo manasijam marīcībhir yasmin ravinivahatulyo'pi vahate sadā khadyotābhāṃ bhuvanamadhuraḥ kaustubhamaṇiḥ samantād unmīlad valabhidupalastambhayugalaprabhājaitraṃ keśidvijadalitakeyūralalitam madaklāmyadgopīpaṭalahaṭhakaṇṭhagrahaparaṃ bhujadvaṃdvaṃ yasya sphuṭasurabhigandhaṃ vijayate jihīte sāmrājyaṃ jagati navalāvaṇyalaharīparīpākasyāntarmuditamadanāveśamadhuram naṭadbhrūvallīkaṃ smitanavasudhākelisadanaṃ sphuranmuktāpaṅktipratimaradanaṃ yasya vadanam kim ebhir vyāhāraiḥ kalaya kathayāmi sphuṭamahaṃ sakhe niḥsaṃdehaṃ paricayapadaṃ kevalam idam parānando yasminnayanapadavībhāji bhavitā tvayā vijñātavyo madhurarava so'yaṃ madhuripuḥ vilokethāḥ kṛṣṇaṃ madakalamarālīratikalāvidagdha vyāmugdhaṃ yadi puravadhūvibhramabharaiḥ tadā nāsmān grāmyāḥ śravaṇapadavīṃ tasya gamayeḥ sudhāpūrṇaṃ cetaḥ kathamapi na takraṃ mṛgayate yadā vṛndāraṇyasmaraṇalaharīheturamaṇaṃ pikānāṃ veveṣṭi pratiharitam uccaiḥ kuhurutam vahante vā vātāḥ sphuritagirimallīparimalās tadaivāsmākīnāṃ giram upaharethā murabhidi purā tiṣṭhan goṣṭhe nikhilaramaṇībhyaḥ priyatayā bhavān yasyāṃ gopīramaṇa vidadhe gauravabharam sakhī tasyā vijñāpayati lalitā dhīralalitaṃ praṇamya śrīpādāmbujakanakapīṭhīparisare prayatnād ābālyaṃ navakamalinīpallavakulais tvayā bhūyo yasyāḥ kṛtam ahaha saṃvardhanam abhūt cirād ūdhobhārasphuraṇagarimākrāntajaghanā babhūva praṣṭhauhī muramathana seyaṃ kapilikā samīpe nīpānāṃ tricaturadalā hanta gamitā tvayā mākandapriyasahacarībhāvaniyatim iyaṃ sā vāsantī galadamalamādhvīkapaṭalīmiṣād agre gopīramaṇa rudatī rodayati naḥ prasūto devakyā muramathana yaḥ ko'pi puruṣaḥ sa jāto gopālābhyudayaparamānandavasatiḥ dhṛto yo gāndhinyā kaṭhinajaṭhare samprati tataḥ samantād evāstaṃ śiva śiva gatā gokulakathā ariṣṭenoddhūtāḥ paśupasudṛśo yānti vipadaṃ tṛṇāvartākrānto racayati bhayaṃ catvaracayaḥ amī vyomībhūtā vrajavasatibhūmīparisarā vahante saṃtāpaṃ murahara vidūraṃ tvayi gate tvayā nāgantavyaṃ kathamiha hare goṣṭhamadhunā latāśreṇī vṛndāvanabhuvi yato'bhūdviṣamayī prasūnānāṃ gandhaṃ kathamitarathā vātanihitaṃ bhajan sadyomūrchāṃ vahati nivaho gopasudṛśām kathaṃ saṅgo 'smābhiḥ saha samucitaḥ samprati hare vayaṃ grāmyā nāryastvamasi nṛpakanyārcitapadaḥ gataḥ kālo yasmin paśuparamaṇīsaṅgamakṛte bhavān vyagrastasthau tamasi gṛhavāṭīviṭapini vayaṃ tyaktāḥ svāmin yad iha tava kiṃ dūṣaṇamidaṃ nisargaḥ śyāmānām ayam atitarāṃ duṣpariharaḥ kuhūkaṇṭhair aṇḍāvadhi sahanivāsāt paricitā visṛjyante sadyaḥ kalitanavapakṣair balibhujaḥ ayaṃ pūrvo raṅgaḥ kila viracito yasya tarasā rasād ākhyātavyaṃ parikalaya tannāṭakam idam mayā praṣṭavyo 'si prathamam iti vṛndāvanapate kim āho rādheti smarasi kṛpaṇaṃ varṇayugalam aye kuñjadroṇīkuharagṛhamedhin kim adhunā parokṣaṃ vakṣyante paśuparamaṇīdurniyatayaḥ pravīṇā gopīnāṃ tava caraṇapadme 'rpitamanā yayau rādhā sādhāraṇasamucitapraśnapadavīm tvayā goṣṭhaṃ goṣṭhītilaka kila cedvismṛtam idaṃ na tūrṇaṃ dhūmorṇāpatirapi vidhatte yadi kṛpām aharvṛndaṃ vṛndāvanakusumapālīparimalair durālokaṃ śokāspadamatha kathaṃ neṣyati sakhī taraṃgaiḥ kurvāṇā śamanabhaginīlāghavam asau nadīṃ kāṃcid goṣṭhe nayanajalapūrair ajanayat itīvāsyā dveṣād abhimatadaśāprārthanamayīṃ murāre vijñaptiṃ niśamayati mānī na śamanaḥ kṛtākṛṣṭikrīḍaṃ kimapi tava rūpaṃ mama sakhī sakṛd dṛṣṭādūrād ahitahitabodhojjhitamatiḥ hatāseyaṃ premānalam anuviśantī sarabhasaṃ pataṃgīvātmānaṃ murahara muhur dāhitavatī mayā vācyaḥ kiṃ vā tvamiha nijadoṣāt param asau yayau mandā vṛndāvanakumudabandho vidhuratām yadarthaṃ duḥkhāgnir dahati na tamadyāpi hṛdayān na yasmāddurmedhā lavamapi bhavantaṃ davayati trivakrāho dhanyā hṛdayam iva te svaṃ vapur iyaṃ samāsādya svairaṃ yadiha vilasantī nivasati dhruvaṃ puṇyabhraṃśād ajani saraleyaṃ mama sakhī praveśas tatrābhūt kṣaṇam api yadasyā na sulabhaḥ kim āviṣṭā bhūtaiḥ sapadi yadi vā krūraphaṇinā kṣatāpasmāreṇa cyutamatir akasmāt kim apatat iti vyagrairasyāṃ gurubhir abhito veṇuninadaśravād vibhraṣṭāyāṃ murahara vikalpā vidadhire navīneyaṃ sampratyakuśalaparīpākalaharī narīnarti svairaṃ mama sahacarīcittakuhare jagannetraśreṇīmadhura mathurāyāṃ nivasataś cirādārtā vārttāmapi tava yadeṣā na labhate janān siddhādeśānnamati bhajate māntrikagaṇān vidhatte śuśrūṣām adhikavinayenauṣadhividām tvadīkṣādīkṣāyai paricarati bhaktā girisutāṃ manīṣā hi vyagrā kimapi sukhahetuṃ na manute paśūnāṃ pātāraṃ bhujagaripupattrapraṇayinaṃ smarodvardhikrīḍaṃ nibiḍaghanasāradyutiharam sadābhyarṇe nandīśvaragiribhuvo raṅgarasikaṃ bhavantaṃ kaṃsāre bhajati bhavadāptyai mama sakhī bhavantaṃ saṃtaptā vidalitatamālāṅkurarasair vilikhya bhrūbhaṅgīkṛtamadanakodaṇḍakadanam nidhāsyantī kaṇṭhe tava nijabhujāvallarīm asau dharaṇyām unmīlajjaḍimanibiḍāṅgī viluṭhati kadācinmūḍheyaṃ nibiḍabhavadīyasmṛtimadād amandād ātmānaṃ kalayati bhavantaṃ mama sakhī tathāsyā rādhāyā virahadahanākalpitadhiyo murāre duḥsādhyā kṣaṇamapi na bādhā viramati tvayā saṃtāpānām upari parimuktāpi rabhasād idānīm āpede tadapi tava ceṣṭāṃ priyasakhī yadeṣā kaṃsāre bhidurahṛdayaṃ tvāmavayatī satīnāṃ mūrdhanyā bhidurahṛdayābhūd anudinam samakṣaṃ sarveṣāṃ viharasi samādhipraṇayinām iti śrutvā nūnaṃ gurutarasamādhiṃ kalayati sadā kaṃsārāte bhajasi yamināṃ netrapadavīm iti vyaktaṃ sajjībhavati yamam ālambitum api murāre kālindīsalilacaladindīvararuce mukunda śrīvṛndāvanamadana vṛndārakamaṇe vrajānandin nandīśvara dayita nandātmaja hare sadeti krandantī parijanaśucaṃ kandalayati samantād uttaptastava virahadāvāgniśikhayā kṛtodvegaḥ pañcāśugamṛgayuvedhavyatikaraiḥ tanūbhūtaṃ sadyas tanuvanam idaṃ hāsyati hare haṭhādadya śvo vā mama sahacarīprāṇahariṇaḥ payorāśisphītatviṣi himakarottaṃsamadhure dadhāne dṛgbhaṅgyā smaravijayirūpaṃ mama sakhī hare dattasvāntā bhavati tadimāṃ kiṃ prabhavati smaro hantuṃ kiṃtu vyathayati bhavān eva kutukī vijānīṣe bhāvaṃ paśuparamaṇīnāṃ yadumaṇe na jānīmaḥ kasmāt tad api bata māyāṃ racayasi samantādadhyātmaṃ yadiha pavanavyādhiralapad balād asyāstena vyasanakulameva dviguṇitam gurorantevāsī sa bhajati yadūnāṃ sacivatāṃ sakhī kālindīyaṃ kila bhavati kālasya bhaginī bhavedanyaḥ ko vā narapatipure matparicito daśāmasyāḥ śaṃsan yadutilaka yastvāmanunayet viśīrṇāṅgīm antarvaṇaviluṭhanād utkalikayā parītāṃ bhūyasyā satatam aparāgavyatikarām paridhvastāmodāṃ viramitasamastālikutukāṃ vidho pādasparśādapi sukhaya rādhākumudinīm vipattibhyaḥ prāṇān kathamapi bhavatsaṅgamasukhaspṛhādhīnā śaure mama sahacarī rakṣitavatī atikrānte sampratyavadhidivase jīvanavidhau hatāśā niḥśaṅkaṃ vitarati dṛśau cūtamukule pratīkārārambhaślathamatibhir udyatpariṇater vimuktāyā vyaktasmarakadanabhājaḥ parijanaiḥ amuñcantī saṅgaṃ kuvalayadṛśaḥ kevalam asau balādadya prāṇānavati bhavadāśāsahacarī aye rāsakrīḍārasika mama sakhyāṃ navanavā purā baddhā yena praṇayalaharī hanta gahanā sa cenmuktāpekṣastvamasi dhig imāṃ tūlaśakalaṃ yadetasyā nāsānihitamidamadyāpi calati mukunda bhrāntākṣī kimapi yad asaṃkalpitaśataṃ vidhatte tadvaktuṃ jagati manujaḥ kaḥ prabhavati kadācitkalyāṇī vilapati yad utkaṇṭhitamatis tad ākhyāmi svāmin gamaya makarottaṃsapadavīm abhūt ko 'pi premā mayi murāriripor yaḥ sakhi purā parāṃ karmāpekṣāmapi tadavalambād alaṅghayam tathedānīṃ hā dhik samajani taṭasthaḥ sphuṭamaham bhaje lajjāṃ yena kṣaṇamapi punarjīvitum garīyān me premā tvayi paramiti snehalaghutā na jīviṣyāmīti praṇayagarimakhyāpanavidhiḥ kathaṃ nāyāsīti smaraṇaparipāṭīprakaṭanaṃ harau sandeśāya priyasakhi na me vāgavasaraḥ amī kuñjaḥ pūrvaṃ na mama dadhire kāmapi mudaṃ drumālīyaṃ cetaḥ sakhi na katiśo nanditavatī idānīṃ paśyaite yugapad upatāpaṃ vidadhate prabhau muktopekṣe bhajati na hi ko vā vimukhatām kadā premonmīlanmadanamadirākṣīsamudayaṃ balādākarṣantaṃ madhuramuralīkākalikayā muhurbhrāmyaccillīculukitakulastrīvratamahaṃ vilokeyaṃ līlāmadamiladapāṅgī murabhidam yayau kālaḥ kalyāṇini kalitakelīparimalāṃ vilāsārthī yasminn acalakuhare līnavapuṣam sa māṃ dhṛtvā dhṛṣṭaḥ kṛtakapaṭaroṣāṃ sakhi haṭhād akārṣīd ākarṣann urasi śaśilekhāśatavṛtām raṇadbhṛṅgaśreṇīsuhṛdi śaradārambhamadhure vanānte cāndrībhiḥ kiraṇalaharībhirdhavalite kadā premoddaṇḍasmarakalahavaitaṇḍikam ahaṃ kariṣye govindaṃ niviḍabhujabandhapraṇayinam mano me hā kaṣṭaṃ jvalati kimahaṃ hanta karavai na pāraṃ nāvāraṃ sumukhi kalayāmy asya jaladheḥ iyaṃ vande mūrdhnā sapadi tamupāyaṃ kathaya māṃ parāmṛṣye yasmāddhṛtikaṇikayāpi kṣaṇikayā prayāto māṃ hitvā yadi kaṭhinacūḍāmaṇirasau prayātu svacchandaṃ mama samayadharmaḥ kila gatiḥ idaṃ soḍhuṃ kā vā prabhavati yataḥ svapnakapaṭādihāyāto vṛndāvanabhuvi balān māṃ ramayati anaucityaṃ tasya vyathayati mano hanta mathurāṃ tvamāsādya svairaṃ capalahṛdayaṃ vāraya harim sakhi svapnārambhe punarapi yathā vibhramamadād ihāyāto dhūrtaḥ kṣapayati na me kiṅkiṇiguṇam ayi svapno dūre viramatu samakṣaṃ śṛṇu haṭhād aviśvastā mā bhūriha sakhi manovibhramadhiyā vayasyaste govardhanavipinamāsādya kutukādakāṇḍe yadbhūyaḥ smarakalahapāṇḍityamatanot amarṣāddhāvantīṃ gahanakuhare sūcitapathāṃ tulākoṭikvānaiś cakitapadapātadviguṇitaiḥ didhīrṣan māṃ harṣottaralanayanāntaḥ sa kutukī na vaṃśīmajñāsīdbhuvi karasarojādvigalitām aśaktāṃ gantavye kalitanavacelāñcalatayā latālībhiḥ puṣpasmitaśavalitābhir virudatīm parīhāsārambhī priyasakhi samālambitamukhīṃ prapede cumbāya sphuradadharabimbastava sakhā tato 'haṃ dhammille sthagitamuralīkā sakhi śanairalīkāmarṣeṇa bhramadaviralabhrūrudacalam kacākṛṣṭikrīḍākramaparicite cauryacarite harirlabdhopādhiḥ prasabhamanayan māṃ giridarīm kadācidvāsantīkuharabhuvi dhṛṣṭaḥ sarabhasaṃ hasan pṛṣṭhālambī sthagayati karābhyāṃ mama dṛśau didhīrṣau jāterṣyaṃ mayi sakhi tadīyāṅguliśikhāṃ na jāne kutrāyaṃ vrajati kitavānāṃ kila guruḥ atīteyaṃ vārtā viramatu puraḥ paśya sarale vayasyaste so 'yaṃ smitamadhurimonmṛṣṭavadanaḥ bhujastambhollāsādabhimataparīrambharabhasaḥ smarakrīḍāsindhuḥ kṣipati mayi bandhūkakusumam taduttiṣṭha vrīḍāvati niviḍamuktālatikayā badhānemaṃ dhūrtaṃ sakhi madhupurīṃ yāti na yathā iti premonmīladbhavadanubhavārūḍhajaḍimā sakhīnāmākrandaṃ na kila katiśaḥ kandalayati aho kaṣṭaṃ bālyādahamiha sakhīṃ duṣṭahṛdayā muhurmānagranthiṃ sahajasaralāṃ grāhitavatī tadārambhād gopīgaṇaratiguro nirbharamasau na lebhe lubdhāpi tvadamalabhujastambharabhasam alinde kālindīkamalasurabhau kuñjavasater vasantīṃ vāsantīnavaparimalodgāricikurām tvadutsaṅge nidrāsukhamukulitākṣīṃ punarimāṃ kadāhaṃ seviṣye kisalayakalāpavyajaninī dhṛtānandāṃ vṛndāvanaparisare śāradaniśāvilāsollāsena glapitakavarīphullakusumām tava skandhopānte vinihitabhujāvallarimahaṃ kadā kuñje līnā rahasi vihasiṣyāmi sumukhīm vidūrādāhartuṃ kusumamupayāmi tvamadhunā purastīre tīre kalaya tulasīpallavamidam iti vyājādenāṃ viditabhavadīyasthitirahaṃ kadā kuñje gopīramaṇa gamayiṣyāmi samaye iti śrīkaṃsāreḥ padakamalayorgokulakathāṃ nivedya pratyekaṃ bhaja parijaneṣu praṇayitām nijāṅke kādambīsahacara vahan maṇḍanatayā na yān uccaiḥ premapravaṇamanujagrāha bhagavān miladbhṛṅgīṃ haṃsīramaṇa vanamālāṃ prathamato mudā kṣemaṃ pṛcchann idamupaharethā mama vacaḥ ciraṃ kaṃsārāterurasi sahavāsapraṇayinīṃ kim enām enākṣīṃ guṇavati visasmāra bhavatī idaṃ kiṃ vā hanta smarasi rasike khaṇḍanaruṣā parītāṅgī govardhanagirinitambe mama sakhī bhiyā saṃbhrāntākṣaṃ yadiha vicakarṣa tvayi balād gṛhītvā vibhraśyan navaśikhiśikhaṃ gokulapatim tataḥ sambhāṣethāḥ śrutimakaramudrāmiti mudā bhavatyāṃ kartavyaḥ kimiti kuśalapraśnajaḍimā rucismerā yā tvaṃ racayasi sadā cumbanakalām apāṅgena spṛṣṭā sakhi murariporgaṇḍamukure nivāsaste devi śravaṇalatikāyāmiti dhiyā prayatnāt tvāmeva praṇayahṛdayā yāmi śaraṇam parokṣaṃ vṛṣṇīnāṃ nibhṛtanibhṛtaṃ karṇakuhare hareḥ kākūnmiśrāṃ kathaya sakhi rādhāvidhuratām parīrambhaṃ premṇā mama savinayaṃ kaustubhamaṇau bruvāṇaḥ kurvīthāḥ patagavara vijñāpanamidam agādhā rādhāyāmapi tava sakhe vismṛtirabhūt kathaṃ vā kalyāṇaṃ vahati tarale hi praṇayitā muhuḥ kūjatkāñcīmaṇivalayamañjīramuralīravālambo bhrāmyadyuvatīkulagītaiḥ suramaṇe sa kiṃ sākṣādbhāvī punarapi hares tāṇḍavarasair amandaḥ kālindīpulinabhuvi tauryatrikabharaḥ navīnastvaṃ kambo paśuparamaṇībhiḥ paricayaṃ na dhatse rādhāyāḥ guṇagarimagandhe 'pi na kṛtī tathāpi tvāṃ yāce hṛdayanihitaṃ dohadamahaṃ vahante hi klānte praṇayamavadātaprakṛtayaḥ gṛhītvā govindaṃ jaladhihṛdayānandana sakhe sukhena śrīvṛndāvanaparisare nandatu bhavān kathaṃ vā te goṣṭhaṃ bhavatu dayitaṃ hanta balavān yadetasmin veṇorjayati cirasaubhāgyamahimā iti premodgārapravaṇamanunīya kramavaśāt parīvārān bhrātarniśamayati cāṇūramathane punaḥ kopodbhinnapraṇayacaṭulaṃ tasya nikaṭe kathāmācakṣīthāḥ daśabhiravatārairvilasitām grahītuṃ tvāṃ premāmiṣaparivṛtaṃ cittabaḍiśaṃ mahāmīna kṣipraṃ nyadhita rasapūre mama sakhī vivekākhyaṃ chittvā guṇamatha tad agrāsi bhavatā hatāśeyaṃ kiṃ vā śiva śiva vidhātuṃ prabhavati varākīyaṃ dṛṣṭvā subhagavapuṣo vibhramabharaṃ tavābhyarṇaṃ bheje paramakutukollāsitamatiḥ tirodhāya svāṅgaṃ prakaṭayasi yat tvaṃ kaṭhinatāṃ tadetat kiṃ na syāt tava kamaṭhamūrteḥ samucitam sadā kaṃsārate sphurati ciramadyāpi bhavataḥ sphuṭaṃ kroḍākāre vapuṣi niviḍapremalaharī yataḥ sā sairandhrī malayaruhapaṅkapraṇayinī tvayā kroḍīcakre paramarabhasādātmadayitā cirādantarbhūtā naraharimayī mūrtirabhitastadīyo vyāpārastava tu na yayau vismṛtipatham vinītaprahlādastvamiha paramakrūracarite prasakto yadbhūyaḥ parahṛdayabhedaṃ janayasi yadātmānaṃ darpād agaṇitagurur vāmana mudā manorājyenāḍhyaṃ tvayi balitayā kalpitavatī prapede tasyedaṃ phalamucitameva priyasakhī vidūre yat kṣiptā vyasanamayapāśe nigaḍitā iyaṃ nātha krūrā bhṛgupatanam ākāṅkṣati tato yadasyāṃ kāṭhinyaṃ tava samucitaṃ tadbhṛgupate iyaṃ te durbodhā kṛtiriha bhavadvismṛtipathaṃ yato yātaḥ sākṣādgururapi sa nandīśvarapatiḥ nirānandā gāvaściramupasṛtā dūṣaṇakulaiḥ kharāyante sadyo raghutilaka govardhanataṭīḥ virādhatvaṃ ghoṣo vrajati bhavadīyapravasanād idānīṃ mārīcaḥ sphuṭamiha narīṇartti paritaḥ prapannaḥ kālo 'yaṃ punar udayituṃ rāsabhajanair vilāsinn adyāpi sphuṭam anaparādhā vayamapi vitanvānaḥ kāntiṃ vapuṣi śaradākāśavalitāṃ kuto na tvaṃ sīradhvaja bhajasi vṛndāvanamidam na rāgaṃ sarvajña kvacidapi vidhatte ratipatiṃ muhurdveṣṭi drohaṃ kalayati balādiṣṭavidhaye ciraṃ dhyānāsaktā nivasati sadā saugataratistathāpyasyāṃ ha ho sadayahṛdaya tvaṃ na dayase parikleśamlecchān samadamadhupālīmadhurayā nikṛntanetrāntapraṇayaracanākhaḍgalatayā tvamāsīnaḥ kalkinniha caturagopāhitaratiḥ svadeśaṃ kurvīthāḥ pratimuditam ārādhikam idam iti premodghāṭasaṃpuṭitavacobhaṅgir akhilaṃ tvamāvedya klidyanmukhaparisaro locanajalaiḥ tato govindasya prativacanamādhvīkapadavīm upāsīno dṛgbhyāṃ kṣaṇam avadhīthāḥ khagapate praṇetavyo dṛṣṭeranubhavapathaṃ nandatanayo vidheyo gopīnāṃ bhuvanamahitānām upakṛtiḥ iyaṃ yāmairgamyā catura mathurāpi tricaturair iti dvaidhaṃ nāntaḥ kalaya kalahaṃsīkulapate apūrvā yasyāntarvilasati mudā sārasarucir vivektuṃ śakyete sapadi milite yena payasī kathaṃ kāraṃ yukto bhavatu bhavatastasya kṛtinā vilambaḥ kādambīramaṇa mathurāsaṅgamavidhau prapannaḥ premāṇaṃ bhagavati sadā bhāgavatabhāk parācīno janmāvadhibhavarasādbhaktimadhuraḥ ciraṃ ko 'pi śrīmān jayati viditaḥ sākaratayā dhurīṇo dhīrāṇām adhidharaṇi vaiyāsakiriva rasānām ādhārair aparicitadoṣaḥ sahṛdayair murārāteḥ krīḍāniviḍaghaṭanārūpamahitaḥ prabandho 'yaṃ bandhorakhilajagatāṃ tasya sarasāṃ prabhorantaḥ sāndrāṃ pramadalaharīṃ pallavayatu